தமிழ்நாட்டில் புதிய ஆட்சிப் பொறுப்பேற்றுள்ள முதலமைச்சர் சி. ஜோசப் விஜய் தலைமையிலான தவெக (தமிழக வெற்றிக் கழகம்) அரசின் சட்டத்துறை அமைச்சகத்தின் கீழ் மேற்கொள்ளப்பட்டு வரும் அரசு வழக்கறிஞர்கள் (Government Pleaders) நியமன விவகாரம், தற்போது கோட்டை வட்டாரத்திலும் கட்சிக்குள்ளும் பெரும் புயலைக் கிளப்பியுள்ளது. தகுதி மற்றும் மெரிட் அடிப்படையில் மட்டுமே இந்த முறை வழக்கறிஞர்கள் தேர்வு செய்யப்படுவார்கள் என்று அரசுத் தரப்பில் தொடர்ந்து கூறப்பட்டு வந்த நிலையில், இந்த நியமனங்களில் பல கோடிகள் கைமாறியிருப்பதாகத் தவெக கட்சியின் மாநில வழக்கறிஞர் பிரிவுக்குள்ளேயே கடுமையான புகைச்சல் எழுந்துள்ளது. இந்த விவகாரம் தற்போது சென்னை உயர் நீதிமன்றத்தில் (Madras High Court) வழக்காகவும், விளக்க மனுவாகவும் தாக்கல் செய்யப்பட்டுள்ளது தவெக வட்டாரத்தை அதிர வைத்துள்ளது.
பரப்பப்படும் லஞ்சப் புகார்களின் பின்னணியில், தங்களுக்குச் சாதகமான பதவிகளைப் பெற எதிர்க்கட்சியினரே பெருமளவில் களம் இறங்கியுள்ளதாக அதிரடித் தகவல்கள் வெளியாகியுள்ளன. பணம் யாருடையது என்று கூட முறையாக விசாரிக்காமல், சில முக்கிய அமைச்சர்கள் மற்றும் அவர்களின் அதிகார நிழலில் இருக்கும் நபர்கள் தங்களுக்கு நெருக்கமான வழக்கறிஞர்களுக்குப் பதவிகளை வாரி வழங்கியுள்ளதாகக் குற்றம் சாட்டப்படுகிறது. இதில் வேடிக்கை என்னவென்றால், கோடிக்கணக்கில் பணம் கொடுத்து அரசு வழக்கறிஞர் போஸ்டிங் வாங்கிய வக்கீல்கள் லிஸ்ட்டில் ஆளும் தவெக-வை விட, திமுக, அதிமுக மற்றும் பாஜக போன்ற எதிர்க்கட்சிகளைச் சேர்ந்த வழக்கறிஞர்களின் பெயர்களே நீளமாக இருப்பதாகக் கட்சி நிர்வாகிகள் தலைமைக்கு ரகசியப் புகார்களை அனுப்பியுள்ளனர்.
சென்னையில் மட்டும் இந்த நியமனங்களை ஒருங்கிணைக்கும் தவெக-வின் மாநில வழக்கறிஞர் பிரிவைச் சேர்ந்த ஒரு முக்கியப் புள்ளி, சில கோடிகள் வரை கல்லா கட்டியிருப்பதாக எழுந்துள்ள குற்றச்சாட்டு முதலமைச்சர் விஜய்யின் கவனத்திற்கும் கொண்டு செல்லப்பட்டுள்ளது. கடந்த 40 ஆண்டுகளில் இல்லாத அளவிற்கு வெளிப்படைத்தன்மையுடன் இந்த முறை வழக்கறிஞர்கள் தேர்வு செய்யப்படுவதாக அரசு கூறி வந்த நிலையில், இந்த உள்கட்சி விவகாரம் எதிர்க்கட்சிகளுக்குப் புதிய ஆயுதமாக மாறியுள்ளது. தகுதி இல்லாத நபர்களும், மாற்று அரசியல் சிந்தனை கொண்டவர்களும் முக்கியப் பொறுப்புகளுக்குள் நுழைந்திருப்பது தவெக-வின் சட்டப் போராட்டங்களைப் பலவீனப்படுத்தும் என கட்சியின் மூத்த நிர்வாகிகள் கவலை தெரிவித்துள்ளனர்.
எல்லை மீறிப் போய்க்கொண்டிருக்கும் இந்த விவகாரத்திற்கு முற்றுப்புள்ளி வைக்கவும், முறைகேடாகப் பதவிக்கு வந்தவர்களுக்கு செக் வைக்கவும் சட்டத்துறை அமைச்சர் சி.டி.ஆர். நிர்மல் குமார் தற்போது ஒரு அதிரடி அறிவிப்பை வெளியிட்டுள்ளார். “நியமனம் செய்யப்பட்டுள்ள அனைத்து அரசு வழக்கறிஞர்களின் செயல்பாடுகளும் அடுத்த 6 மாத காலத்திற்கு மிகத் தீவிரமாகக் கண்காணிக்கப்படும்; அவர்களின் தகுதி, நேர்மை மற்றும் வாதாடும் திறன் திருப்திகரமாக இல்லை என்றால் எவ்விதப் பரிந்துரையுமின்றி அவர்கள் உடனடியாகப் பதவியிலிருந்து நீக்கப்படுவார்கள்” என்று அமைச்சர் நிர்மல் குமார் எச்சரித்துள்ளார். அமைச்சரின் இந்த அதிரடி கிடுக்கிப்பிடி உத்தரவு, தகுதியின்றிப் பணம் கொடுத்துப் பதவியைப் பிடித்த வழக்கறிஞர்கள் மத்தியில் பெரும் கலக்கத்தை ஏற்படுத்தியுள்ளது.
