தமிழகத்தில் அண்மையில் நடந்து முடிந்த சட்டமன்றத் தேர்தலுக்கான தி.மு.க வேட்பாளர் பட்டியல் வெளியானதில் இருந்தே, தென் மாவட்டத்தின் முக்கிய முகமாகவும், முன்னாள் தகவல் தொழில்நுட்பம் மற்றும் பால்வளத்துறை அமைச்சராகவும் இருந்த மனோ தங்கராஜ் தீவிர அரசியல் களத்திலிருந்து ஒதுங்கி முற்றிலும் மௌனமாக (Silent) இருப்பது அரசியல் வட்டாரத்தில் பெரும் பேசுபொருளாக மாறியுள்ளது. தனக்கு மீண்டும் போட்டியிட வாய்ப்பு மறுக்கப்பட்டதால் தி.மு.க தலைமை மீது அவர் கடும் அதிருப்தியில் இருப்பதாகவும், இதன் காரணமாகவே தவெக (தமிழக வெற்றிக் கழகம்) அரசு குறித்து எவ்வித விமர்சனமும் செய்யாமல் அமைதி காத்து வருவதாகவும் கூறப்படுகிறது.
கன்னியாகுமரி மாவட்டம் பத்மநாபபுரம் தொகுதியின் சட்டமன்ற உறுப்பினராக இருந்த மனோ தங்கராஜுக்கு இந்த முறை தி.மு.க தலைமை போட்டியிட சீட் வழங்கவில்லை. பால்வளத்துறையில் எழுந்த பல்வேறு சர்ச்சைகள், கனிமவளக் கடத்தல் குற்றச்சாட்டுகள் மற்றும் உளவுத்துறை அளித்த ரகசிய அறிக்கையின் அடிப்படையிலேயே அவரது பெயர் வேட்பாளர் பட்டியலில் இருந்து நீக்கப்பட்டதாகக் கட்சி வட்டாரங்கள் தெரிவிக்கின்றன. இதனால் கடும் ஏமாற்றமடைந்த அவர், தனது ஆதரவாளர்களுடன் ஆலோசனை நடத்தி அடுத்தகட்ட அரசியல் நகர்வுகள் குறித்து ஆலோசித்து வருவதாகத் தெரிகிறது.
இந்த நிலையில், தனக்குத் தி.மு.க-வில் சீட் கிடைக்காது என்பதை முன்கூட்டியே அறிந்த மனோ தங்கராஜ், த.வெ.க-வின் தேர்தல் பிரிவு மேலாண்மை பொதுச்செயலாளர் ஆதவ் அர்ஜுனாவை அவரது சென்னை போயஸ் கார்டன் இல்லத்தில் நேரில் சந்தித்துப் பேசியதாகப் புதிய தகவல் ஒன்று கசிந்துள்ளது. “தான் உடனடியாகத் த.வெ.க-வில் இணையத் தயாராக இருப்பதாகவும், தனக்குப் பத்மநாபபுரம் தொகுதியிலும், தனது ஆதரவாளர்களுக்குக் கிள்ளியூர், குளச்சல் உள்ளிட்ட அண்டை தொகுதிகளிலும் போட்டியிட வாய்ப்பளிக்க வேண்டும்” என அவர் பேரம் பேசியதாக டெல்லி மற்றும் சென்னை அரசியல் வட்டாரங்களில் செய்திகள் உலா வருகின்றன.
ஏற்கனவே, கடந்த சில மாதங்களுக்கு முன்பு அமைச்சரவைப் பொறுப்பில் இருந்து விடுவிக்கப்பட்ட போதே மனோ தங்கராஜ் தவெக-வை நோக்கி நகர முயன்றதாகவும், பின்னர் தி.மு.க தலைமையை மிரட்டி மீண்டும் அமைச்சர் பதவியைப் பெற்றார் என்றும் தவெக தரப்பில் அதிருப்தி நிலவுவதாகக் கூறப்படுகிறது. இதனால் அவரை உடனடியாகத் தவெக-வில் இணைக்கக் கட்சியின் பொதுச்செயலாளர் ஆனந்த் உள்ளிட்ட மூத்த நிர்வாகிகள் தயக்கம் காட்டி வருவதாகத் தெரிகிறது. தி.மு.க-வில் ஓரங்கட்டப்பட்ட மனோ தங்கராஜின் இந்த மௌனமும், தவெக அரசு குறித்தான அவரது ‘சைலண்ட்’ நிலைப்பாடும் தென் மாவட்ட அரசியலில் விரைவில் ஒரு புதிய புயலைக் கிளப்பும் என எதிர்பார்க்கப்படுகிறது.
