நீட் தேர்வு வினாத்தாள் கசிவு மற்றும் முறைகேடுகளுக்கு எதிராக நாடு முழுவதும் அமைதியான முறையில் போராட்டத்தில் ஈடுபட்டு வரும் மாணவர்களை, பிரதமர் நரேந்திர மோடி தலைமையிலான அரசு “நாட்டின் எதிரிகள்” போல நடத்தி வருவதாகக் காங்கிரஸ் நாடாளுமன்றக் குழுத் தலைவருமான சோனியா காந்தி கடுமையாகக் குற்றம் சாட்டியுள்ளார். மாணவர்களின் நியாயமான கோரிக்கைகளுக்குப் பதிலளிக்க முடியாமல், மத்திய அரசு “பயந்தாங்கொள்ளித்தனத்துடனும் கொடூரமான அத்துமீறலுடனும்” நடந்து கொள்வதாக அவர் பகிரங்கமாகக் சாடியுள்ளார்.
பிரபல ஆங்கில நாளிதழில் எழுதியுள்ள கட்டுரையில் தனது மௌனத்தைக் கலைத்துப் பேசியுள்ள சோனியா காந்தி, ஜூலை 20 அன்று டெல்லியில் அமைதியாகப் பேரணி சென்ற மாணவர்கள் மீது டெல்லி காவல்துறையும் மத்திய ஆயுதக் காவல் படையும் நடத்திய காட்டுமிராண்டித்தனமான தடித்தாக்குதல் மற்றும் கண்ணீர்ப்புகைக் குண்டு வீச்சை “அவமானகரமான நாள்” (Day of Infamy) எனக் குறிப்பிட்டுள்ளார். எதிர்காலச் சிற்பிகளான நமது இளைஞர்கள் மீது இந்த அரசு அடக்குமுறையை ஏவிவிட்டுள்ளதாகவும் அவர் வேதனை தெரிவித்துள்ளார்.
மத்திய அரசின் தேசியத் தேர்வுகள் முகமை (NTA) என்பது போதிய ஊழியர்கள் இன்றி, தனியார் ஒப்பந்ததாரர்களை மட்டுமே நம்பியிருக்கும் ஒரு சீர்குலைந்த அமைப்பு என விமர்சித்துள்ள அவர், கடந்த 12 ஆண்டுகளில் 150-க்கும் மேற்பட்ட தேர்வுத் தாள் கசிவுச் சம்பவங்கள் நடந்துள்ளதாகச் சுட்டிக்காட்டியுள்ளார். கல்வியை அளவுக்கு அதிகமாகத் தனியார்மயமாக்கியதும், வேலைவாய்ப்பின்மை 40 சதவீதமாக உயர்ந்துள்ளதும் தான் இந்திய இளைஞர்களை வீதிக்கு வரவழைத்துள்ளதாக சோனியா காந்தி தனது கட்டுரையில் விவரித்துள்ளார்.
போராடும் மாணவர்கள் அனைவரும் இந்தியாவின் மகன்களும் மகள்களுமே தவிர எதிரிகள் அல்ல என்பதை உணர்ந்து, அவர்கள் மீதான வன்முறைத் தாக்குதல்களை அரசு உடனடியாக நிறுத்த வேண்டும் என்றும் அவர் வலியுறுத்தியுள்ளார். கல்வி அமைப்பில் சீர்திருத்தங்களைக் கொண்டு வருவதற்கும், பாதிக்கப்பட்ட கோடிக்கணக்கான மாணவர்களின் எதிர்காலத்தைப் பாதுகாப்பதற்கும் மத்திய அரசுடனான உரையாடல்களையும் வெளிப்படையான விசாரணையையும் உடனடியாகத் தொடங்க வேண்டும் என்றும் காங்கிரஸ் கட்சி சார்பில் கோரிக்கை விடுக்கப்பட்டுள்ளது.
