அமெரிக்கா முன்மொழிந்த புதிய போர் நிறுத்த ஒப்பந்தப் முன்மொழிவை ஈரான் நாடு திட்டவட்டமாக நிராகரித்துள்ளதாகத் தகவல்கள் வெளியாகியுள்ளன. அமெரிக்க அதிபர் டொனால்ட் ட்ரம்ப், ஈரானுக்கு எதிராக இதுவரை இல்லாத அளவிலான “பிரம்மாண்டத் தாக்குதலை” (Massive Attack) நடத்துவது குறித்துத் தீவிரமாகப் பரிசீலித்து வரும் சூழலில், ஈரானின் இந்த அதிரடி மறுப்பு மத்திய கிழக்கில் போர்ப் பதற்றத்தை உச்சக்கட்டத்திற்கு உயர்த்தியுள்ளது.
அமெரிக்க அதிபர் ட்ரம்பை வாஷிங்டனில் நேரில் சந்தித்துப் பேசிய ஈராக் பிரதமர் அலி அல்-ஜைதி (Ali al-Zaidi), அமெரிக்கா சார்பில் தயாரிக்கப்பட்ட போர் நிறுத்த வரைவுத் திட்டத்தைச் சுமந்துகொண்டு டெஹ்ரானுக்குப் பயணம் மேற்கொண்டார். அங்கு ஈரானிய அதிபர் மசூத் பெசெஷ்கியான் மற்றும் வெளியுறவுத்துறை அமைச்சர் அப்பாஸ் அராக்சி ஆகியோரைச் சந்தித்துப் பேச்சுவார்த்தை நடத்திய போதிலும், ஈரானியத் தலைமை இந்தத் தற்காலிகப் போர் நிறுத்த முன்மொழிவை ஏற்க மறுத்துவிட்டது.
உலகளாவிய வர்த்தகம் மற்றும் கச்சா எண்ணெய் விநியோகத்தில் மிக முக்கியப் புள்ளியாகத் திகழும் ‘ஹார்முஸ் நீரிணை’ (Strait of Hormuz) மீதான யாருடைய கட்டுப்பாடு என்பது குறித்துத் தெளிவான தீர்வு எட்டப்படாத எந்தவொரு தற்காலிக ஒப்பந்தத்திலும் தங்களுக்கு உடன்பாடில்லை என ஈரானிய அதிகாரிகள் தெரிவித்துள்ளனர். அமெரிக்காவின் பேராசை கொண்ட அணுகுமுறையே பேச்சுவார்த்தை முறிவுக்குக் காரணம் என ஈரானிய வெளியுறவுத்துறை சாடியுள்ளது.
ஈரான் அமைதி உடன்படிக்கைக்கு மறுப்புத் தெரிவித்துள்ளதைத் தொடர்ந்து, அமெரிக்கா தனது ராணுவத் தாக்குதல்களைத் தீவிரப்படுத்தினால், பதிலுக்குத் தெல் அவீவ் (Tel Aviv) நகரின் மீது ஏவுகணைத் தாக்குதல்களை நடத்துவோம் என்றும், ஏமனின் ஹூதி அமைப்பினரைக் கொண்டு செங்கடலில் முழுமையான முற்றுகையை ஏற்படுத்துவோம் என்றும் ஈரான் எச்சரித்துள்ளது. இரு நாடுகளும் பின்வாங்க மறுப்பதால், உலக அளவில் எரிசக்தி நெருக்கடியும் போர்ச் சூழலும் மேலும் தீவிரமடைந்து வருகின்றன.
