ரஷ்யாவிடமிருந்து வாங்கப்பட்ட எஸ்-400 (S-400) வான் பாதுகாப்பு ஏவுகணை அமைப்பை முழுமையாக அகற்றும் வரை, துருக்கி நாட்டிற்கு அதிநவீன எஃப்-35 (F-35) ரகப் போர் விமானங்களை வழங்க முடியாது என்று அமெரிக்க வெளியுறவுத்துறை நாடாளுமன்றத்திற்கு (Congress) எழுதியுள்ள அதிகாரப்பூர்வக் கடிதத்தில் திட்டவட்டமாகத் தெரிவித்துள்ளது. சமீபத்தில் அங்காராவில் நடைபெற்ற நேட்டோ மாநாட்டின் போது, துருக்கிக்கு எஃப்-35 விமானங்களை வழங்குவது குறித்து பரிசீலிக்கப்படும் என்று அமெரிக்க அதிபர் டொனால்ட் டிரம்ப் தெரிவித்திருந்த நிலையில், வெளியுறவுத்துறையின் இந்த அறிவிப்பு இரு நாடுகளுக்கும் இடையே மீண்டும் பரபரப்பை ஏற்படுத்தியுள்ளது.
ஜனநாயகக் கட்சியின் நாடாளுமன்ற உறுப்பினர் வெஸ்லி பெல் எழுப்பிய கேள்விக்குப் பதிலளிக்கும் விதமாகக் கடிதம் எழுதியுள்ள அமெரிக்க வெளியுறவுத்துறை, அமெரிக்காவின் ‘காட்சா’ (CAATSA – Countering America’s Adversaries Through Sanctions Act) சட்டப் பிரிவுகளின் கீழ் துருக்கி மீது விதிக்கப்பட்ட நிபந்தனைகள் இன்னும் நடைமுறையிலேயே உள்ளதாக சுட்டிக்காட்டியுள்ளது. ரஷ்ய தயாரிப்பான எஸ்-400 ஏவுகணைகள் மற்றும் அதுசார்ந்த சாதனங்களைத் துருக்கி தனது வசம் வைத்திருக்கும் வரை, எஃப்-35 விமானங்கள் விநியோகம் செய்ய சட்டப்படி வழியில்லை என்றும் அக்கூற்றில் குறிப்பிடப்பட்டுள்ளது.
நேட்டோ அமைப்பில் அங்கத்துவ நாடாக இருக்கும் துருக்கி, ரஷ்யாவிடமிருந்து எஸ்-400 ஏவுகணைகளை வாங்குவதற்குத் தீர்மானித்த போதே, அமெரிக்காவின் எஃப்-35 போர் விமானத் திட்டத்திலிருந்து நீக்கப்பட்டது. அமெரிக்காவின் 5-ஆம் தலைமுறை எஃப்-35 போர் விமானங்களின் ரகசியத் தொழில்நுட்பங்களை ரஷ்யாவின் எஸ்-400 வான் பாதுகாப்பு அமைப்பு உளவு பார்க்கக்கூடும் என்ற பாதுகாப்பு அச்சமே அமெரிக்காவின் இந்தத் தீவிரமான நிலைப்பாட்டிற்குக் முதன்மைக் காரணமாக இருந்து வருகிறது.
துருக்கி தற்சமயம் வரை இந்த நிபந்தனைகளைப் பூர்த்தி செய்யவில்லை என்றும், எதிர்காலத்தில் இதுபோன்ற ரசாயன மற்றும் ஏவுகணை அமைப்புகளை வாங்க மாட்டோம் என்ற உறுதியை அளித்தால் மட்டுமே எஃப்-35 திட்டம் குறித்து பரிசீலிக்க முடியும் என்றும் அமெரிக்கா தெளிவுபடுத்தியுள்ளது. இதனிடையே, எஸ்-400 விவகாரத்திற்குச் சட்டப்பூர்வமான மற்றும் வெளிப்படையான தீர்வுகளைக் காணும் நோக்கில் வாஷிங்டன் மற்றும் அங்காரா இடையே தூதரக ரீதியிலான பேச்சுவார்த்தைகள் தொடர்ந்து நடைபெற்று வருவதாகவும் தகவல்கள் தெரிவிக்கின்றன.
