காஸ்பியன் கடல் பகுதியில் பயணித்துக் கொண்டிருந்த ஈரானிய வணிகக் கப்பல் மீது உக்ரைன் ராணுவம் நடத்திய ஆளில்லா விமான (Drone) தாக்குதலில் மாலுமி ஒருவர் பலியானதைத் தொடர்ந்து, உக்ரைனுக்கு எதிராக நேரடி தாக்குதல் நடத்தப்படும் என ஈரான் பகிரங்க எச்சரிக்கை விடுத்துள்ளது. ரஷ்யா-உக்ரைன் போரும், மத்திய கிழக்கில் அமெரிக்கா-ஈரான் மோதலும் ஒன்றாக இணைந்து மிகப்பெரிய உலகப் போராக (WW3) உருவெடுக்குமோ என்ற அச்சத்தை இந்த சம்பவம் சர்வதேச அரங்கில் ஏற்படுத்தியுள்ளது.
காஸ்பியன் கடலில் ரஷ்யாவிற்கு ராணுவ தளவாடங்கள் மற்றும் அணு/ட்ரோன் பாகங்களைக் கொண்டு சென்றதாகக் கூறி, ஈரானிய சரக்குக் கப்பலை இலக்கு வைத்து உக்ரைன் நீண்ட தூர ட்ரோன் தாக்குதலை நடத்தியது. இதில் கப்பலில் சக்திவாய்ந்த வெடிப்பு ஏற்பட்டு ஒருவர் உயிரிழந்த நிலையில், மற்றொருவர் பலத்த காயமடைந்தார். இந்த தாக்குதலை உறுதிப்படுத்திய உக்ரைன் அதிபர் வோலோடிமிர் ஜெலென்ஸ்கி, ரஷ்யாவுக்கு ஆயுத விநியோகம் செய்யும் ஈரானிய நெட்வொர்க்குகளை அழிப்பதே தங்களின் நோக்கம் என்று பிரகடனம் செய்தார்.
இச்சம்பவத்திற்கு கடும் கண்டனம் தெரிவித்துள்ள ஈரானிய வெளியுறவு அமைச்சகம், இது நாட்டின் இறையாண்மை மீதான அக்கிரம தாக்குதல் என்றும், உக்ரைனின் இந்த நடவடிக்கைக்கு தகுந்த பதிலடி கொடுக்கப்படும் என்றும் எச்சரித்துள்ளது. ஈரான் தலைநகர் தெஹ்ரானில் உள்ள உக்ரைன் தூதரை நேரில் வரவழைத்து ஈரான் அரசு தனது கடுமையான எதிர்ப்பைப் பதிவு செய்துள்ளதோடு, ஐநா பாதுகாப்பு கவுன்சில் மற்றும் ஐரோப்பிய ஒன்றியம் உக்ரைனின் இந்த செயலுக்குப் பொறுப்பேற்கச் செய்ய வேண்டும் எனக் கோரிக்கை விடுத்துள்ளது.
அதேவேளையில், மத்திய கிழக்கில் உள்ள அமெரிக்க மற்றும் வளைகுடா நாடுகளின் ராணுவ முகாம்களைச் செயற்கைக்கோள் மூலம் கண்காணித்து, அந்த ரகசியப் படங்களை ரஷ்யா ஈரானுக்கு வழங்கி தாக்குதல்களுக்கு உதவி வருவதாக ஜெலென்ஸ்கி குற்றஞ்சாட்டியுள்ளார். அமெரிக்காவின் கடல்வழி தடைகளால் ஏற்கனவே பாதிக்கப்பட்டுள்ள ஈரானுக்கு, காஸ்பியன் கடல் வழியிலான வடக்கு வர்த்தகப் பாதையிலும் உக்ரைன் தாக்குதல் நடத்தியிருப்பது, இரண்டு பெரிய உலகப் போர்களை ஒன்றாக இணைக்கும் ஆபத்தான முனையாக மாறியுள்ளது என சர்வதேச அரசியல் வல்லுநர்கள் சுட்டிக்காட்டுகின்றனர்.
