அமெரிக்கப் முன்னாள் அதிபரும் தற்போதைய அதிபருமான டொனால்ட் டிரம்ப், காற்றாலை மின்சாரப் பயன்பாட்டைக் கடுமையாக விமர்சித்துப்பேசும் முயற்சியில், அமெரிக்காவில் நடைபெறாத ஒரு மிகப்பெரிய “தொலைக்காட்சி சேவை முடக்கத்தை” (Massive Television Outage) மக்கள் நினைவுகூர வேண்டும் எனக் கூறியது சர்வதேச ஊடகங்கள் மற்றும் செய்தி நிறுவனங்களின் கவனத்தைப் பெற்றுள்ளது. காற்றில்லாத நேரத்தில் காற்றாலைகள் இயங்காது என்பதால் இரண்டு ஆண்டுகளுக்கு முன்பு நாடு முழுவதும் தொலைக்காட்சிகள் முடங்கியதாக அவர் கூறிய கதை முற்றிலும் போலியானது எனத் தகவல் சரிபார்ப்பு அமைப்புகள் சுட்டிக்காட்டியுள்ளன.
சமீபத்தில் நடைபெற்றப் பொதுக்கூட்டம் மற்றும் செய்தியாளர்கள் சந்திப்பின் போது பேசிய டிரம்ப், புதுப்பிக்கத்தக்க ஆற்றல் மூலங்களான காற்றாலைகள் மற்றும் சூரிய ஒளி மின்சார அமைப்புகள் மீது தனது வழக்கமான தாக்குதலைத் தொடுத்தார். அப்போது, “இரண்டு ஆண்டுகளுக்கு முன்பு காற்றில்லாத போது நாடு முழுவதும் மின்சாரம் துண்டிக்கப்பட்டு, யாருடைய வீட்டிலும் தொலைக்காட்சி ஓடாத அந்த பெரிய முடக்கத்தை நினைவில் வைத்திருக்கிறீர்களா?” என்று கூட்டத்திலிருந்த மக்களிடம் கேள்வி எழுப்பினார். ஆனால், அமெரிக்க வரலாற்றில் காற்றாலை மின்சாரத்தால் அத்தகையதொரு மின்சார முடக்கமோ அல்லது தொலைக்காட்சி சேவை பாதிப்போ ஒருபோதும் நிகழ்ந்ததில்லை.
அமெரிக்க மின் உற்பத்தி அமைப்புகள் எப்போதுமே காற்றாலை மின்சாரத்தை மட்டுமே நம்பியிருக்காமல், நிலக்கரி, இயற்கை எரிவாயு மற்றும் அணுமின் நிலையங்கள் உள்ளடக்கிய கலவையான மின் விநியோகக் கட்டமைப்பையே பயன்படுத்தி வருகின்றன. மேலும், காற்று வீசாத காலங்களில் பயன்படுத்துவதற்காகப் பிரம்மாண்ட பேட்டரி சேமிப்பு அமைப்புகளும் பயன்பாட்டில் உள்ளன. இத்தகைய அறிவியல் உண்மைகளைப் புறந்தள்ளிவிட்டு, காற்றாலை மின்சாரத்தைக் குறை கூறுவதற்காக இல்லாத ஒரு சம்பவத்தை நடந்ததாகக் கூறி டிரம்ப் பிரச்சாரம் செய்வது இது முதல் முறையல்ல என்பதும் குறிப்பிடத்தக்கது.
முன்னதாகப் புதுப்பிக்கத்தக்க எரிசக்தி திட்டங்களுக்கு எதிராகவும், புதைபடிவ எரிபொருட்களான கச்சா எண்ணெய் மற்றும் நிலக்கரி பயன்பாட்டிற்கு ஆதரவாகவும் தொடர்ந்து குரல் கொடுத்து வரும் டிரம்ப், நகைச்சுவை பாணியில் இத்தகைய கற்பனைக் கதைகளைக் கூறி வருகிறார். இருப்பினும், அதிபர் பொறுப்பில் உள்ள ஒருவர் முற்றிலும் பொய்யான தகவல்களைத் தொடர்ச்சியாகக் கூறி மக்களை நம்ப வைக்க முயற்சிப்பது ஊடகங்கள் மற்றும் சுற்றுச்சூழல் ஆர்வலர்களிடையே கடும் விமர்சனங்களை எழுப்பியுள்ளது.
