தமிழக வெற்றிக் கழகத் (த.வெ.க) தலைவரும் தற்போதைய முதலமைச்சருமான விஜய், தமிழகத்தின் நிரந்தர முதல்வராக ஆட்சிப் பொறுப்பில் நீடிக்க வேண்டும் என்ற பிராத்தனையை முன்வைத்து, கையில் அரசாளும் செங்கோலை ஏந்தியபடி சென்னை பனையூரில் உள்ள கட்சித் தலைமை அலுவலகத்தை நோக்கி நடைபயணம் மேற்கொண்ட தவெக நிர்வாகியைக் காவல் துறையினர் வழியிலேயே தடுத்து நிறுத்திய சம்பவம் அரசியல் வட்டாரத்தில் பரப்பரப்பை ஏற்படுத்தியுள்ளது.
தவெகவைச் சேர்ந்த தீவிர தொண்டரான அந்த நிர்வாகி, தன் கட்சித் தலைவர் விஜய்யின் ஆட்சி தமிழகத்தில் நிலைத்து நிற்க வேண்டும் என்பதையும், அவரது மக்கள் நலத் திட்டங்கள் தொடர வேண்டும் என்பதையும் வலியுறுத்தி இந்த வினோத்தமான நேர்த்திக்கடன் நடைபயணத்தைத் தொடங்கினார். கையில் தங்க நிறத்தில் வடிவமைக்கப்பட்ட பிரம்மாண்ட செங்கோல் மற்றும் கட்சியின் கொடியை ஏந்தியவாறு, பாதயாத்திரையாகச் சென்னை பனையூர் கட்சி தலைமை அலுவலகத்தை நோக்கி அவர் வீரியத்துடன் முன்னேறிச் சென்றார்.
பொதுமக்களுக்கு இடையூறு இல்லாமல் சாலை ஓரமாக அவர் நடந்து சென்றபோதிலும், அனுமதியின்றிப் பிரசாரப் பேரணி மற்றும் அரசியல் நடைபயணங்களை மேற்கொள்ளக் கூடாது என்ற விதிகளின் அடிப்படையில், பாதுகாப்புப் பணியில் ஈடுபட்டிருந்த காவல் துறையினர் அவரை வழியிலேயே தடுத்து நிறுத்தி விசாரணை நடத்தினர். காவலர்களின் இந்தத் திடீர் தடையால் ஆத்திரமடைந்த அப்பகுதி தவெக தொண்டர்கள் மற்றும் ஆதரவாளர்கள் காவல் துறையினருடன் வாக்குவாதத்தில் ஈடுபட்டதால் அப்பகுதியில் சிறிது நேரம் சலசலப்பு நிலவியது.
சட்டம் ஒழுங்கு நடைமுறைகள் மற்றும் பாதுகாப்பு நெறிமுறைகளைச் சுட்டிக்காட்டிய அதிகாரிகள், தகுந்த அனுமதி பெற்ற பிறகே இத்தகைய நடைபயணங்களைத் தொடர முடியும் என அறிவுறுத்தி அவரை அப்புறப்படுத்தினர். இருப்பினும், செங்கோல் ஏந்தி முதல்வருக்காக நடைபயணம் மேற்கொண்ட தொண்டரின் வீடியோ சமூக வலைத்தளங்களில் வைரலாகி, கட்சித் தொண்டர்கள் மற்றும் நெட்டிசன்கள் மத்தியில் பெரும் கவனத்தையும் விவாதத்தையும் ஈர்த்துள்ளது.
