தமிழக வெற்றிக் கழகத் தலைவரும் முதலமைச்சருமான விஜய்யின் வாகன அணிவகுப்பு மற்றும் நிகழ்ச்சிகளின் போது அவசர சிகிச்சைக்கான ஆம்புலன்ஸ் வாகனம் திருப்பிவிடப்பட்டதாகச் சமூக வலைத்தளங்களில் பரவி வரும் வீடியோக்கள் பொதுமக்கள் மற்றும் அரசியல் வட்டாரத்தில் பெரும் விவாதத்தைக் கிளப்பியுள்ளன. முதலமைச்சரின் பாதுகாப்பிற்காக அவசர சிகிச்சை வாகனம் வழிமறிக்கப்பட்டது என்ற குற்றச்சாட்டு முன்வைக்கப்பட்ட நிலையில், இந்த வைரல் வீடியோவின் உண்மைப் பின்னணி குறித்த விளக்கங்கள் வெளியாகியுள்ளன.
சமூக வலைத்தளங்களில் வைரலாகப் பரவி வரும் அந்த வீடியோ காட்சிகளைப் பரிசீலித்த போது, போக்குவரத்து காவல் துறையினர் வழக்கமான முதலமைச்சர் கான்வாய் பாதுகாப்புப் பணியில் ஈடுபட்டிருந்தது தெரியவந்துள்ளது. இருப்பினும், தூரத்திலேயே ஆம்புலன்ஸ் வாகனம் சைரன் ஒலியுடன் வருவதைக் கவனித்த காவல் துறை அதிகாரிகள், கான்வாய் வாகனங்களை ஓரங்கட்டி உடனடியாக ஆம்புலன்ஸ் சிரமமின்றி கடந்து செல்ல முன்னுரிமை அளித்து வழி ஏற்படுத்திக் கொடுத்துள்ளனர்.
இதுகுறித்துத் போக்குவரத்து காவல் துறை அதிகாரிகள் மற்றும் உண்மைச் சரிபார்ப்பு அமைப்புகள் அளித்துள்ள விளக்கத்தில், “முதலமைச்சர் உள்ளிட்ட உயர் பாதுகாப்புப் பிரமுகர்களின் பயணத்தின் போது கூட, அவசர மருத்துவ வாகனங்களுக்கு முதன்மை உரிமை அளிப்பது கட்டாய நடைமுறையாகும். எந்தவொரு சூழலிலும் ஆம்புலன்ஸ்கள் நிறுத்தப்படவோ அல்லது தேவையின்றி மாற்று வழியில் திருப்பிவிடப்படவோ இல்லை” என்று தெளிவுபடுத்தியுள்ளனர். தவறான சூழமைவோடு (Misleading context) இந்த வீடியோ பரப்பப்பட்டுள்ளதாகத் தெரிவிக்கப்பட்டுள்ளது.
சமூக வலைத்தளங்களில் அரசியல் காரணங்களுக்காக அரைகுறையான வீடியோ துணுக்குகளைப் பகிர்ந்து வதந்திகளைப் பரப்புவதைத் தவிர்க்க வேண்டும் எனப் பொதுமக்களுக்குக் காவல் துறை வேண்டுகோள் விடுத்துள்ளது. அவசர கால மருத்துவ ஊர்திகளுக்குப் பாதையில் தடையின்றி முன்னுரிமை அளிக்கும் பாதுகாப்பு நெறிமுறைகள் மிகக் கடுமையாகப் பின்பற்றப்பட்டு வருவதாகவும் அரசுத் தரப்பில் உறுதி செய்யப்பட்டுள்ளது.
