அமெரிக்காவில் கடந்த 35 ஆண்டுகளில் இல்லாத அளவுக்குத் தட்டம்மை (Measles) நோய் பரவல் தீவிரமடைந்து வரும் வேளையில், குழந்தைகளுக்கு ஒரே முறையில் வழங்கப்படும் முத்தடுப்பூசியான MMR-ஐ (தட்டம்மை, பொன்னுக்கு வீங்கி, ரூபெல்லா) மூன்று தனித்தனி தடுப்பூசிகளாகப் பிரித்து வழங்க வேண்டும் என அதிபர் டொனால்ட் டிரம்ப் புதிய நிர்வாக உத்தரவில் (Executive Order) கையெழுத்திட்டுள்ளார். ஒரே நேரத்தில் பல தடுப்பூசிகளைச் செலுத்துவதற்குப் பதிலாக, ஒவ்வொரு மருத்துவப் பயணத்தின் போதும் தனித்தனியாகத் தடுப்பூசிகளைப் பிரித்து வழங்குவதே பெற்றோரின் உரிமைக்கும் குழந்தைகளின் ஆரோக்கியத்திற்கும் நல்லது என வெள்ளை மாளிகை சார்பில் தெரிவிக்கப்பட்டுள்ளது.
அமெரிக்காவில் நடப்பாண்டில் 2,300-க்கும் மேற்பட்ட தட்டம்மை பாதிப்புகள் பதிவாகியுள்ள சூழலில், டிரம்ப்பின் இந்த அறிவிப்பு மருத்துவக் குழுவினர் மற்றும் பொதுச் சுகாதார நிபுணர்கள் மத்தியில் பெரும் அதிர்ச்சியையும் கவலையையும் ஏற்படுத்தியுள்ளது. தற்போது அமெரிக்க சந்தையில் தட்டம்மை, பொன்னுக்கு வீங்கி மற்றும் ரூபெல்லா ஆகிய நோய்களுக்கான தனித்தனித் தடுப்பூசிகள் தனியாகக் கிடைப்பதில்லை என்றும், புதிய தனித் தடுப்பூசிகளை உற்பத்தி செய்து அனுமதி பெறுவதற்கு நீண்ட காலம் பிடிக்கும் என்றும் சுட்டிக்காட்டப்படுகிறது.
அமெரிக்கச் குழந்தைகள் நல மருத்துவக் கழகம் (AAP) உள்ளிட்ட முன்னணி மருத்துவ அமைப்புகள் மற்றும் எதிர்க்கட்சியினர் அதிபர் டிரம்ப்பின் இந்த முடிவுக்குக் கடும் எதிர்ப்பு தெரிவித்துள்ளனர். ஒரே தடுப்பூசியாகக் கொடுப்பதற்குப் பதிலாகப் பலமுறை மருத்துவமனைக்குச் சென்று தனித்தனியாகத் தடுப்பூசி போடுவதால், குழந்தைகள் குறிப்பிட்ட காலத்திற்குள் முழுமையான நோய் எதிர்ப்புச் சக்தியைப் பெற முடியாமல் நோய் பரவலுக்கு ஆளாகும் அபாயம் அதிகரிக்கும் என மருத்துவ நிபுணர்கள் எச்சரித்துள்ளனர்.
மேலும், தடுப்பூசிகளுக்கும் மனவளர்ச்சிக் குறைபாட்டிற்கும் (Autism) இடையே எந்தவொரு அறிவியல் ரீதியான தொடர்பும் இல்லை எனப் பல ஆய்வுகள் நிரூபித்துள்ள போதிலும், அறிவியல் சான்றுகளைப் புறந்தள்ளிவிட்டு அரசியல் லாபத்திற்காக இத்தகைய முடிவுகள் எடுக்கப்படுவதாகக் குற்றச்சாட்டுகள் எழுந்துள்ளன. தட்டம்மை நோய் பரவலைக் கட்டுப்படுத்த தடுப்பூசி செலுத்தும் விகிதத்தை உயர்த்த வேண்டிய சூழலில், அரசின் இந்த புதிய உத்தரவு பெற்றோர் மத்தியில் குழப்பத்தையும் அச்சத்தையும் மேலும் அதிகப்படுத்தியுள்ளது.
