தமிழ்நாட்டில் வடகிழக்குப் பருவமழை தொடங்குவதற்கு முன்னதாக ஏரிகள், குளங்கள் மற்றும் பாசனக் கால்வாய்களைத் தூர்வாரிப் புனரமைக்கும் மாபெரும் பணி நாளை முதல் தொடங்கவுள்ளது. மத்திய அரசின் ‘விபிஜி ராம்ஜி’ (VPG Ramji) திட்டத்தின் கீழ், கிராமப்புற வேலைவாய்ப்பை உறுதிசெய்யும் 125 நாட்கள் வேலைவாய்ப்புத் திட்டத்தைப் பயன்படுத்தி இந்த நீர்நிலைப் பாதுகாப்புப் பணிகள் முன்னெடுக்கப்படவுள்ளன. இதற்காகத் தமிழக அரசு ₹507.92 கோடி நிதியை ஒதுக்கீடு செய்துள்ளது.
இத்திட்டத்தின் முதற்கட்டமாகத் தமிழ்நாட்டில் உள்ள 37 மாவட்டங்களில் (சென்னை நீங்கலாக) சுமார் 10,185 வரத்துக் கால்வாய்கள் மற்றும் 809 ஏரிகள், குளங்கள், ஊரணிகள் ஆகியவை தூர்வாரப்பட்டுப் புனரமைக்கப்பட உள்ளன. இதன் மூலம் மழைக்காலங்களில் அதிகளவில் பொழியும் நீரைச் சேமித்து நிலத்தடி நீர்மட்டத்தை உயர்த்தவும், விவசாயிகளுக்கான பாசன வசதிகளை தடையின்றி மேம்படுத்தவும் முடியும் என நீர்வளத்துறை அமைச்சகம் தெரிவித்துள்ளது.
மேலும், பருவமழைக் காலங்களில் குடியிருப்புப் பகுதிகள் மற்றும் விவசாய நிலங்களில் வெள்ளப் பெருக்கு ஏற்பட்டு பாதிப்புகள் உண்டாவதைத் தடுப்பதே இதன் முக்கிய நோக்கம் ஆகும். கிராமப்புற மக்களின் வாழ்வாதாரத்தை உயர்த்தும் வகையில், 100 நாட்கள் வேலைத் திட்டத்தை 125 நாட்களாக உயர்த்திய மத்திய அரசின் சட்டத் திருத்தத்தின் அடிப்படையில், இத்திட்டம் தமிழகத்தில் முழு வீச்சில் செயல்படுத்தப்படவுள்ளது.
இப்பணியில் மக்களும் மக்கள் பிரதிநிதிகளும் அதிகளவில் இணைய வேண்டும் என்று நீர்வளத்துறை சார்பில் கேட்டுக்கொள்ளப்பட்டுள்ளது. இதில் அமைச்சர்கள், சட்டமன்ற உறுப்பினர்கள், உள்ளாட்சிப் பிரதிநிதிகள், பொதுமக்கள் மற்றும் தன்னார்வலர்கள் இணைந்து செயல்பட்டு நீர்நிலைகளைப் பாதுகாக்க முன்வர வேண்டும் என அழைப்பு விடுக்கப்பட்டுள்ளது.
