பிரிட்டனில் தஞ்சம் கோரும் அகதிகளுக்கு அந்நாட்டு உள்துறை அமைச்சகம் வழங்கியுள்ள விழிப்புணர்வு வழிகாட்டி கையேடு பெரும் சர்ச்சையையும் கடுமையான விமர்சனங்களையும் கிளப்பியுள்ளது. அந்நாட்டில் பெண்களுக்கு எதிராக அதிகரிக்கும் பாலியல் குற்றங்கள் மற்றும் தாக்குதல்களைத் தொடர்ந்து, அகதிகளுக்கு “பெண்களை எவ்வாறு துன்புறுத்தக் கூடாது” மற்றும் பாலியல் ஒப்புதலின் முக்கியத்துவம் குறித்த அடிப்படை வழிகாட்டுதல்கள் வழங்கப்பட்டதே இந்த சர்ச்சைக்கும் மக்கள் அமைதியற்ற நிலைக்கும் முதன்மை காரணமாக அமைந்துள்ளது.
அந்நாட்டு உள்துறை அமைச்சகம், பிரிட்டனின் கலாச்சாரம், சட்ட விதிகள் மற்றும் பெண்களின் உரிமைகள் குறித்து புதிதாக வருபவர்களுக்கு புரிய வைக்கும் நோக்கில் இத்தகைய கையேட்டை வெளியிட்டதாகக் கூறுகிறது. குறிப்பாக, பாலியல் வன்கொடுமை, துன்புறுத்தல், அனுமதி இல்லாமல் தொடர்பு கொள்ளுதல் போன்ற செயல்கள் பிரிட்டன் சட்டப்படி கடுமையான குற்றங்கள் என்பதை இதில் தெளிவுபடுத்த முயன்றுள்ளனர். இருப்பினும், இத்தகைய அடிப்படை மனித உரிமைகளை வழிகாட்டி மூலம் கற்பிக்க முற்பட்டிருப்பது பெரும் அதிருப்தியை ஏற்படுத்தியுள்ளது.
இந்த விவகாரத்தை சுட்டிக்காட்டி குரல் எழுப்பியுள்ள உரிமை ஆர்வலர்கள் மற்றும் அரசியல் தலைவர்கள், அடிப்படை சட்டங்களை மதிக்க வேண்டிய அவசியத்தை ஒரு வழிகாட்டி கையேட்டின் மூலம் மட்டுமே கற்பிக்க முடியாது எனக் குற்றம் சாட்டுகின்றனர். பெண்களின் பாதுகாப்பை உறுதி செய்ய உள்துறை அமைச்சகம் மேலும் வலுவான நடவடிக்கைகளை எடுக்கத் தவறிவிட்டதாகவும், இத்தகைய வழிமுறைகள் வெறும் பெயர் அளவிலான நடவடிக்கை என்றும் அவர்கள் கடுமையாக விமர்சித்து வருகின்றனர்.
நாடளாவிய ரீதியில் இந்த விவகாரம் மக்கள் மத்தியில் பெரும் விவாதத்தைக் கிளப்பியுள்ளது. பிரிட்டனில் அகதிகளுக்கு வழங்கப்படும் புகலிட முறைமைகள், தங்குமிட பாதுகாப்பு மற்றும் குற்றத் தடுப்பு நடவடிக்கைகள் குறித்து மீண்டும் கேள்விகள் எழுப்பப்பட்டு வரும் நிலையில், அரசு தரப்பில் சட்ட ஒழுங்கை நிலைநாட்ட கூடுதல் நடவடிக்கைகளை எடுக்க வலியுறுத்தி அழுத்தங்கள் அதிகரித்து வருகின்றன.
