ரஷ்யாவிலிருந்து ஜெர்மனிக்கு பால்டிக் கடல் வழியே இயற்கை எரிவாயுவைக் கொண்டு செல்லும் ‘நார்ட் ஸ்டிரீம்’ (Nord Stream) நீருக்கடியிலானக் குழாய்களில் கடந்த 2022-ஆம் ஆண்டு நடத்தப்பட்ட மாபெரும் குண்டுவெடிப்புச் சம்பவம் தொடர்பாக, உக்ரைனைச் சேர்ந்த தொழில்முறை ஆழ்கடல் நீச்சல் வீரர் வோலோடிமிர் ஜூராவ்லோவ் குரோஷியாவில் கைது செய்யப்பட்டுள்ளார். ஜெர்மனி கூட்டாட்சி வழக்கறிஞர்கள் பிறப்பித்த ஐரோப்பிய பிடிவாரண்டின் அடிப்படையில் குரோஷியாவின் புலா நகரில் வைத்து அந்நாட்டுப் போலீசாரால் அவர் கைது செய்யப்பட்டுள்ளார்.
டென்மார்க்கின் போர்ன்ஹோம் தீவு அருகே கடலடியில் அமைக்கப்பட்டிருந்த நார்ட் ஸ்டிரீம் 1 மற்றும் 2 குழாய்களில் வெடிமருந்துகளைப் பொருத்தித் தகர்த்தக் குழுவில் இந்த உக்ரேனிய நபர் நேரடியாகப் பங்கேற்று ஆழ்கடலில் நீந்திச் சென்றதாக ஜெர்மனி புலனாய்வுத் துறை குற்றம்சாட்டியுள்ளது. போலந்து நாட்டில் ஏற்கனவே கைது செய்யப்பட்டு, அந்நாட்டு நீதிமன்றத்தால் ஜெர்மனிக்குக் காட்டித்தர மறுக்கப்பட்டு விடுவிக்கப்பட்ட நிலையிலும், ஜெர்மனி அரசு விடாமுயற்சியுடன் பிடிவாரண்டை அமல்படுத்தி தற்போது குரோஷியாவில் அவரைச் சிறைபிடித்துள்ளது.
இந்த வழக்கில் ஏற்கனவே உக்ரைன் ராணுவத்தின் முன்னாள் அதிகாரியான செர்ஹி கே (Serhii K.) என்பவர் இத்தாலியில் கைது செய்யப்பட்டு ஜெர்மனிக்கு நாடுகடத்தப்பட்ட நிலையில், தற்போது கைது செய்யப்பட்டுள்ள இரண்டாவது முக்கியச் சந்தேக நபரையும் ஜெர்மனிக்கு நாடுகடத்தி நீதிமன்றத்தில் ஆஜர்படுத்த நடவடிக்க எடுக்கப்பட்டு வருகிறது. போலியான அடையாள ஆவணங்களைப் பயன்படுத்தி வாடகைக்கு எடுக்கப்பட்ட படகின் மூலம் இவர்கள் இந்தச் சதித்திட்டத்தைச் செயல்படுத்தியதாக தெரிவித்துள்ளது.
ரஷ்யா-உக்ரைன் போரின் போது ஐரோப்பாவின் ஆற்றல் விநியோகத்தையே உலுக்கிய இந்த உள்கட்டமைப்புத் தாக்குதலில் உக்ரேனிய அமைப்புகளின் தொடர்பு குறித்து ஜெர்மனி தீவிரமாக விசாரணை நடத்தி வருகிறது. இருப்பினும், இச்சம்பவத்தில் தங்களுக்கு எவ்விதப் பங்கும் இல்லை என உக்ரைன் அரசு தொடர்ந்து மறுத்து வரும் சூழலில், இந்த புதிய கைது நடவடிக்கை சர்வதேச அளவில் பெரும் புவிசார் அரசியல் சலசலப்பை ஏற்படுத்தியுள்ளது.
