பசிபிக் பெருங்கடலில் ரஷியாவிற்கும் ஜப்பானிற்கும் இடையே பல தசாப்தங்களாகத் தொடரும் எல்லைத் தகராறில், புதிய உச்சக்கட்டப் பதற்றத்தை ஏற்படுத்தும் வகையில் ரஷிய ராணுவம் சர்ச்சைக்குரிய குருில் தீவுகள் (Kuril Islands) அருகே சக்திவாய்ந்த ஏவுகணைப் பயிற்சிகளை நடத்தியுள்ளது. ரஷிய அதிபர் விளாடிமிர் புடினின் இந்த அதிரடி நடவடிக்கை, பிராந்தியத்தில் மிகப்பெரிய போர் மேகங்களைச் சூழ்ந்துள்ளதாகவும், ஜப்பானுக்கு விடுக்கப்பட்ட நேரடி எச்சரிக்கை என்றும் சர்வதேச அரசியல் வல்லுநர்கள் எச்சரித்துள்ளனர்.
இரண்டாம் உலகப் போரின் இறுதியிலிருந்து குருில் தீவுகளின் தெற்குப் பகுதியில் உள்ள நான்கு தீவுகளின் உரிமை குறித்து ரஷியாவிற்கும் ஜப்பானிற்கும் இடையே உடன்பாடு எட்டப்படாமல் முரண்பாடுகள் நீடித்து வருகின்றன. ஜப்பான் இத்தீவுகளைத் தனது “வடக்கு பிரதேசங்கள்” என உரிமை கோரி வரும் நிலையில், ரஷியா அங்குத் தனது ராணுவ வலிமையைப் பெருக்கி வருகிறது. தற்போது அப்பகுதியில் ரஷியா நடத்தியுள்ள நீர்மூழ்கிக் கப்பல்கள் மற்றும் கடலோர ஏவுகணைப் பயிற்சிகள் ஜப்பான் அரசைப் பெரும் அதிர்ச்சியில் ஆழ்த்தியுள்ளது.
இந்த ஏவுகணைப் சோதனையைக் கடுமையாகக் கண்டித்துள்ள ஜப்பான் அரசு, ரஷியாவின் இந்த நடவடிக்கை தனது நாட்டின் இறையாண்மைக்கு விடுக்கப்பட்ட அச்சுறுத்தல் என்றும், பசிபிக் பிராந்தியத்தின் அமைதியைச் சீர்குலைக்கும் முயற்சி என்றும் ராஜதந்திர ரீதியிலான எதிர்ப்பைப் பதிவு செய்துள்ளது. உக்ரைன் போரில் பிஸியாக இருக்கும் நிலையிலும், ஆசிய-பசிபிக் பகுதியில் தனது அதிகாரத்தையும் கட்டுப்பாட்டையும் நிலைநிறுத்தவே ரஷியா இத்தகைய நடவடிக்கைகளில் ஈடுபட்டு வருவதாகக் கூறப்படுகிறது.
அமெரிக்கா மற்றும் அதன் கூட்டணி நாடுகளுக்குச் சவாலாக விளங்கும் வகையில், சீனா மற்றும் வடகொரியாவுடன் இணைந்து ரஷியா பசிபிக் பகுதியில் தனது கடற்படை பலத்தைக் காட்டி வருகிறது. இந்தச் சூழலில், சர்ச்சைக்குரிய தீவுகளில் மேற்கொள்ளப்பட்டுள்ள ஏவுகணைப் பாய்ச்சல், கிழக்கு ஆசிய பிராந்தியத்தில் அமைதியற்ற சூழலை உருவாக்கியுள்ளதுடன், அடுத்தகட்டமாக நில ஆக்கிரமிப்பு நடவடிக்கை ஏதேனும் நடக்குமா என்ற அச்சத்தையும் சர்வதேச நாடுகளிடையே அதிகரித்துள்ளது.
