அமெரிக்கா மற்றும் கனடா இடையே நீடித்து வந்த வர்த்தக பேச்சுவார்த்தை திடீரென முறிந்ததைத் தொடர்ந்து, அமெரிக்க அதிபர் டொனால்ட் டிரம்ப் கனடா பிரதமர் மார்க் கர்னிக்கு கடுமையான எச்சரிக்கை விடுத்துள்ளார். கனடா மீது அமெரிக்கா விதித்த 50 சதவீத வரியை எதிர்த்து, டாலருக்கு டாலர் என்ற முறையில் திருப்பி வரி விதிக்கப்படும் என கனடா பிரதமர் அறிவித்திருந்தார். இதனால் ஆத்திரமடைந்த டிரம்ப், “கனடா ஒரு தனி மாநிலமாக இல்லாமல், அமெரிக்க மாநிலத்திற்கு உரிய அனைத்து நன்மைகளையும் அனுபவிக்க விரும்புகிறது. எங்கள் விவசாயிகளிடம் இத்தனை ஆண்டுகள் வசூலித்த அதிகப்படியான வரிகளுக்கு இனி இடம் இல்லை (No More!)” எனத் தனது சோஷியல் மீடியா தளத்தில் கொந்தளித்துள்ளார்.
இந்த மோதலின் பின்னணியில், இரு நாடுகளுக்கும் இடையே பல வாரங்களாக நடைபெற்று வந்த வர்த்தக பேச்சுவார்த்தை தோல்வியில் முடிந்ததே முக்கிய காரணமாகும். அமெரிக்க அரசு முன்வைத்த கடைசி நேர நிபந்தனைகள் மற்றும் மாற்றங்கள் நியாயமற்றவையாகவும், கனடாவின் பொருளாதாரத்தையும் இறையாண்மையையும் பாதிப்பதாகவும் கூறி பேச்சுவார்த்தையை நிறுத்துவதாக கனடா பிரதமர் மார்க் கர்னி அறிவித்தார். இதன் தொடர்ச்சியாக, செப்டம்பர் மாதம் முதல் அமெரிக்க பொருட்களின் மீது அதே அளவிற்கு பதிலடி வரிகள் அமல்படுத்தப்படும் என கனடா உறுதிபடத் தெரிவித்தது.
கனடாவின் இந்த பதிலடி நடவடிக்கைக்கு அமெரிக்க வர்த்தகப் பிரதிநிதி அலுவலகம் தங்களது அதிருப்தியை வெளிப்படுத்தியுள்ளது. முன்பே ஒப்புக்கொண்ட ஒப்பந்த விதிமுறைகளை இறுதி செய்ய கனடா மறுத்துவிட்டதாகவும், ஸ்டீல், அலுமினியம் உள்ளிட்ட முக்கியத் துறைகளில் அமெரிக்கா வரிக் குறைப்பு அளிக்க முன்வந்தும் கனடா புதிய கோரிக்கைகளை எழுப்பி விலகிக் கொண்டதாக அமெரிக்க தரப்பில் குற்றம் சாட்டப்பட்டுள்ளது. அதேவேளையில், கனடா நாட்டு தொழிலாளர்களின் நலன்களையும் சுயமரியாதையையும் விட்டுக் கொடுத்து எந்தவொரு ஒப்பந்தத்தையும் செய்ய முடியாது என்பதில் கர்னி உறுதியாக இருக்கிறார்.
தற்போது அமெரிக்காவினால் விதிக்கப்பட்டுள்ள 50% வரிகள் ஹாக்கி மட்டைகள், கட்டிடப் பொருட்கள், ஆடை மற்றும் விவசாய உபகரணங்கள் உள்ளிட்ட பல பில்லியன் டாலர் மதிப்பிலான கனடிய ஏற்றுமதியை நேரடியாகப் பாதிக்கும். அமெரிக்கா மீண்டும் கனடாவை தனது 51-வது மாநிலமாக மாற்ற நினைப்பதாக பரவும் கருத்துக்கள் இரு நாடுகளின் உறவில் மேலும் விரிசலை ஏற்படுத்தியுள்ளன. சர்வதேச அளவில் பெரும் கவனத்தைப் பெற்றுள்ள இந்த வர்த்தகப் போர், வட அமெரிக்காவின் வர்த்தகச் சூழலிலும் உலகப் பொருளாதாரப் பாதையிலும் பெரும் தாக்கத்தையும் நிச்சயமற்ற தன்மையையும் உருவாக்கியுள்ளது.
