அமெரிக்காவின் புதிய தீவிரப் பொருளாதாரத் தடைகள் மற்றும் போரினால் ஏற்பட்டுள்ள பொருளாதார நெருக்கடிகளுக்கு மத்தியில், ஈரானிய மக்கள் எதிர்கொண்டு வரும் பல்வேறு உள்நாட்டுச் சவால்கள் மற்றும் வாழ்வாதாரப் பிரச்சினைகளைப் ஈரான் அதிபர் மசூத் பெஷெஸ்கியான் (Masoud Pezeshkian) பகிரங்கமாக ஒப்புக்கொண்டுள்ளார். அரசு தொலைக்காட்சியில் உரையாற்றிய அவர், “ஈரான் சமூகத்தில் தற்போது பல சிக்கல்கள் நிலவுவதை நான் அறிவேன். அவற்றைக் கட்டுப்படுத்த அரசு தங்களால் இயன்ற அனைத்து முயற்சிகளையும் செய்து வருகிறது” என்று தெரிவித்துள்ளார்.
அமெரிக்க அதிபர் டொனால்ட் டிரம்ப் அறிவித்துள்ள கடுமையான பொருளாதாரத் தடைகள் மற்றும் பொருளாதாரப் பிளாக் கையாளப்படும் சூழலை சுட்டிக்காட்டிய அவர், நாடு தற்போது முழு அளவிலான பொருளாதாரம், ராணுவம் மற்றும் பாதுகாப்புப் போரில் ஈடுபட்டுள்ளதாகக் குறிப்பிட்டார். ஈரானில் அதிகரித்து வரும் பணவீக்கம், வேலையில்லாத் திண்டாட்டம் மற்றும் நாணய மதிப்பு சரிவு போன்ற காரணங்களால் மக்களின் வாங்கும் திறன் வெகுவாகக் குறைந்துள்ளதையும் அவர் சுட்டிக்காட்டினார்.
நாட்டில் நிலவும் விலைவாசி உயர்வு மற்றும் பொருளாதார அசாதாரணச் சூழலால் அவ்வப்போது வெடிக்கும் மக்கள் போராட்டங்களைக் குறிப்பிட்டும் பேசிய அவர், “பணவீக்கம் மற்றும் வேலைவாய்ப்பின்மை சிக்கல்களைச் சரிசெய்து, மக்கள் கண்ணியத்துடன் வாழ்வதை உறுதி செய்ய முழு இதயத்தோடு உழைத்து வருகிறோம்” எனக் கூறினார். ஈரான் தன்மீதான வெளிநாட்டு அழுத்தங்களை எதிர்கொண்டு மீண்டு வரும் என்றும் நம்பிக்கை தெரிவித்துள்ளார்.
அமெரிக்காவுடனான அமைதிப் பேச்சுவார்த்தைகள் மற்றும் ஹார்முஸ் ஜலசந்தி (Strait of Hormuz) வழிப்பாதை குறித்த விவாதங்கள் தேக்கமடைந்துள்ள நிலையிலும், பாகிஸ்தான் உள்ளிட்ட நாடுகளின் மத்தியஸ்தத்துடன் தூதரக அளவிலான முயற்சிகள் தொடர்வதாக ஈரான் அரசு தரப்பில் தெரிவிக்கப்பட்டுள்ளது.
