இலங்கை சந்தித்த மிகக் கடுமையான பொருளாதார நெருக்கடியின் போது, சர்வதேச நாணய நிதியத்தின் (IMF) கடன் உதவியைப் பெறுவதற்கு இந்தியாவும், இந்திய நிதியமைச்சர் நிர்மலா சீதாராமனும் எவ்வாறு பின்னணியில் நின்று செயல்பட்டார்கள் என்பது குறித்த முக்கியத் தகவல்களை இலங்கையின் முன்னாள் வெளியுறவுத் துறை அமைச்சர் அலி சப்ரி (Ali Sabry) வெளிப்படுத்தியுள்ளார். பேட்டி ஒன்றில் பேசிய அவர், இந்தியாவின் இந்த விரைவான மற்றும் ஆக்கப்பூர்வமான தலையீடே இலங்கை பொருளாதார மீட்சிப் பாதையில் நகர முதன்மைக் காரணமாக இருந்தது என்று தெரிவித்துள்ளார்.
2022-ஆம் ஆண்டு இலங்கையில் அந்நியச் செலவாணி கையிருப்பு முற்றிலும் தீர்ந்து, நாடு நிதி நெருக்கடியில் சிக்கித் தவித்த போது, சர்வதேச அமைப்புகள் இலங்கைக்குக் கடன் வழங்கத் தயக்கம் காட்டி வந்தன. அந்த இக்கட்டான தருணத்தில், வாஷிங்டனில் நடைபெற்ற ஐ.எம்.எஃப் கூட்டத்தின் போது அன்றைய இலங்கைக் குழுவினருடன் இணைந்து செயல்பட்ட நிதியமைச்சர் நிர்மலா சீதாராமன், இலங்கைக்கு உடனடியாக நிதியுதவி அளிக்க வேண்டும் என ஐ.எம்.எஃப் தலைவர்களிடம் நேரடியாக வலியுறுத்தியதாக அலி சப்ரி நினைவுகூர்ந்துள்ளார்.
மேலும், சர்வதேச நாணய நிதியம் தனது உத்தியோகபூர்வ நிதியுதவித் திட்டத்தை (Bailout Package) ஒப்புதல் செய்வதற்கு முன்பாகவே, இந்தியாவின் மூலம் சுமார் 4 பில்லியன் அமெரிக்க டாலர் மதிப்பிலான கடன்கள், எரியபொருள் மற்றும் அத்தியாவசியப் பொருட்களை இலங்கைக்கு வழங்கி இந்தியா “முதலாவது உதவிக்கரத்தை” நீட்டியது. சர்வதேச அளவில் கடன் மறுசீரமைப்புச் சான்றிதழை இலங்கைக்காக முதலில் வழங்கி வழிநடத்தியதும் இந்தியாதான் என்றும் அவர் சுட்டிக்காட்டியுள்ளார்.
சீனா உட்படப் பல நாடுகள் இலங்கையின் கடன் மறுசீரமைப்பிற்கு முடிவெடுக்கக் காலதாமதம் செய்த சூழலில், இந்தியாவின் இந்த உறுதியான நிலைப்பாடு இலங்கைக்கு உலகளாவிய நம்பிக்கையை மீட்டெடுத்துத் தந்தது. ஒரு அண்டை நாடாக இந்தியா காட்டிய இந்த தாராள மனப்பான்மையும், நிதியமைச்சர் நிர்மலா சீதாராமன் சர்வதேச அரங்கில் வகித்த ராஜதந்திர பங்கும் இலங்கை வரலாற்றுப் பக்கங்களில் எப்போதும் மறக்க முடியாத ஒன்று என அலி சப்ரி நன்றியுடன் தெரிவித்துள்ளார்.
