செயற்கை நுண்ணறிவு (AI) தொழில்நுட்பத்தின் அபரிமிதமான வளர்ச்சியால், வரும் மாதங்களில் உலகளவில் முன் எப்போதும் இல்லாத அளவிலான மிக மோசமான சைபர் தாக்குதல்கள் (Cyberattacks) அரங்கேறக்கூடும் என்று 100-க்கும் மேற்பட்ட முன்னணி தொழில்நுட்ப நிறுவனங்கள் கூட்டாக எச்சரித்துள்ளன. ஓபன்ஏஐ (OpenAI), கூகுள் (Google), மைக்ரோசாப்ட் (Microsoft) மற்றும் ஆந்த்ரோபிக் (Anthropic) போன்ற உலகின் முன்னணி AI நிறுவனங்கள் ஒன்றிணைந்து வெளியிட்டுள்ள திறந்த கடிதத்தில் இந்த அதிர்ச்சித் தகவல் தெரிவிக்கப்பட்டுள்ளது.
AI கருவிகள் மற்றும் மாடல்கள் மிக அதிவேகமாகத் திறன் பெற்று வரும் நிலையில், ஹேக்கர்களும் இந்தத் தொழில்நுட்பத்தைப் பயன்படுத்தி மிகவும் சிக்கலான தாக்குதல்களை மிகக் குறைந்த செலவில் முன்னெடுக்கத் தொடங்கியுள்ளனர். குறிப்பாக மருத்துவமனைகள், குடிநீர் விநியோக மையங்கள், நிதி நிறுவனங்கள் மற்றும் இணையக் உள்கட்டமைப்புகள் போன்ற அத்தியாவசியச் சேவைகள் இந்த AI சைபர் தாக்குதல்களால் பெரும் ஆபத்தைச் சந்திக்க வாய்ப்புள்ளதாக இந்தக் கூட்டணி சுட்டிக்காட்டியுள்ளது.
தற்போதைய பாதுகாப்புக் கட்டமைப்புகள் இந்த நவீனத் தாக்குதல்களை எதிர்கொள்ளப் போதுமானதாக இல்லை என்றும், தற்காப்பு நடவடிக்கைகளை வலுப்படுத்த உலக நாடுகளுக்கும் நிறுவனங்களுக்கும் மிகக் குறுகிய கால அவகாசமே எஞ்சியுள்ளது என்றும் அந்தக் கடிதத்தில் வலியுறுத்தப்பட்டுள்ளது. இதற்காக, AI மாடல்களை உருவாக்குபவர்கள் பாதுகாக்கப்பட்ட புதிய அதிநவீன மாடல்களைப் பொதுமக்களுக்கு வெளியிடுவதற்கு முன்பே, அங்கீகரிக்கப்பட்ட சைபர் பாதுகாப்பு நிபுணர்களுக்கு (Vetted Defenders) அவற்றின் ஆரம்பகட்ட அணுகலை (Early Access) வழங்க வேண்டும் என்ற கோரிக்கையும் முன்வைக்கப்பட்டுள்ளது.
ஹேக்கர்கள் அதிநவீன AI மாடல்களைப் பயன்படுத்துவதற்கு முன்பாகவே, பாதுகாப்புக் குழுக்கள் அந்த மாடல்களைக் கொண்டு தங்களது தற்காப்பு அமைப்புகளைச் சோதித்து பலப்படுத்திக் கொள்ள இந்த ‘முன்-அணுகல்’ உதவும் என எதிர்பார்க்கப்படுகிறது. டிஜிட்டல் உலகில் பெரும் அச்சுறுத்தலாக உருவெடுத்து வரும் இந்த AI சைபர் தாக்குதல்களை எதிர்கொள்ள அரசாங்கங்களும் தனியார் நிறுவனங்களும் உடனடியாக இணைந்து செயலாற்ற வேண்டும் எனத் தொழில்நுட்ப வல்லுநர்கள் அழைப்பு விடுத்துள்ளனர்.
