தமிழக முன்னாள் முதலமைச்சர் மு.க. ஸ்டாலினுக்கு வழங்கப்பட்டு வந்த ‘இசட்’ (Z) பிரிவு பாதுகாப்பு வாபஸ் பெறப்பட்டு, அவருக்குக் குறைந்தபட்சப் பாதுகாப்பு அளிக்கப்பட்டுள்ளது. இந்நிலையில், மு.க. ஸ்டாலினுக்கு இசட் பிரிவு பாதுகாப்பு வழங்கப்பட்டது அவர் முதலமைச்சராக இருந்ததற்காக அல்ல என்றும், அவரது உயிருக்கு இருந்த அச்சுறுத்தல் காரணமாகவே 2006-ஆம் ஆண்டிலிருந்தே அது வழங்கப்பட்டு வருகிறது என்றும் பாஜகவின் டிஜிட்டல் நூலகப் பிரிவின் தேசிய ஒருங்கிணைப்பாளர் ஆசீர்வாதம் ஆச்சாரி சுட்டிக்காட்டியுள்ளார்.
இதுகுறித்துத் தனது சமூக வலைதளப் பக்கத்தில் பதிவிட்டுள்ள ஆசீர்வாதம் ஆச்சாரி, 2006-ஆம் ஆண்டு ஜூன் 13 அன்று மதுரை ரயில் நிலையத்தில் மு.க. ஸ்டாலின் மீது ஒருவர் கத்தியால் குத்த முயற்சி செய்த சம்பவத்தை நினைவு கூர்ந்துள்ளார். அப்போது பணியிலிருந்த மத்திய ரிசர்வ் போலீஸ் (CRPF) உடனடியாகச் செயல்பட்டு அசம்பாவிதத்தைத் தடுத்ததாகவும், அதன் தொடர்ச்சியாகவே அப்போதைய மத்திய அமைச்சர் ஆ. ராசா மூலம் பிரதமர் மன்மோகன் சிங் மற்றும் உள்துறை அமைச்சர் சிவராஜ் பாட்டீல் ஆகியோருக்கு உயர்மட்டப் பாதுகாப்பு கோரி கடிதம் எழுதப்பட்டதாகவும் கூறியுள்ளார்.
அந்தக் கடிதத்தின் வரைவை (Draft) தயாரித்ததே தாம் தான் எனக் குறிப்பிட்டுள்ள ஆசீர்வாதம் ஆச்சாரி, டெல்லியில் நடைபெற்ற பேச்சுவார்த்தைகளுக்குப் பிறகே மத்திய அரசால் மு.க. ஸ்டாலினுக்கு இசட் பிரிவு பாதுகாப்பு வழங்கப்பட்டதாகத் தெரிவித்துள்ளார். எனவே, கடந்த 20 ஆண்டுகளுக்கும் மேலாக அவருடைய உயிருக்கு இருக்கும் பாதுகாப்பு அச்சுறுத்தலின் அடிப்படையிலேயே இந்த உயர்மட்டப் பாதுகாப்பு தொடர்ந்து வந்ததாக அவர் விளக்கியுள்ளார்.
தற்போது முதலமைச்சர் பதவி மாறியதை மட்டும் கருத்தில் கொண்டு பாதுகாப்பைக் குறைப்பது சரியான அணுகுமுறையாக இருக்காது எனக் கூறியுள்ள அவர், மு.க. ஸ்டாலினின் இசட் பிரிவு பாதுகாப்பை மீண்டும் தொடர மத்திய உள்துறை அமைச்சரை நேரில் சந்தித்து வலியுறுத்த வேண்டியது திமுக தலைமையின் முக்கியக் கடமை என்றும் அறிவுறுத்தியுள்ளார். பாஜக நிர்வாகி ஒருவரே மு.க. ஸ்டாலினின் பாதுகாப்புக்கு ஆதரவாகப் பேசியிருப்பது அரசியல் களத்தில் பெரும் விவாதத்தை ஏற்படுத்தியுள்ளது.
