உத்தரப் பிரதேச டி20 (UP T20) லீக் தொடரில் நோயடா சூப்பர் கிங்ஸ் அணியின் கேப்டனாகச் செயல்பட்டு வரும் இளம் ஆல்ரவுண்டர் பிரசாந்த் வீர், கான்ப்பூர் சூப்பர்ஸ்டார்ஸ் அணிக்கு எதிரான போட்டியில் தோனி பாணியில் மாஸான ‘ஹெலிகாப்டர் ஷாட்’ அடித்து ரசிகர்களை வியப்பில் ஆழ்த்தியுள்ளார். சென்னை சூப்பர் கிங்ஸ் (CSK) அணியால் கடந்த ஏலத்தில் ரூ. 14.20 கோடிக்கு வாங்கப்பட்ட இவர், களத்தில் காட்டிய இந்த அதிரடி ஆட்டம் சிஎஸ்கே நிர்வாகத்தை நிம்மதி பெருமூச்சு விட வைத்துள்ளது.
கான்ப்பூர் அணிக்கு எதிராக நடைபெற்ற இப்போட்டியில் 10-வது ஓவரில் அஜய் குமார் வீசிய பந்தை, எவ்வித தடுமாற்றமுமின்றி மிட்-விக்கெட் திசையை நோக்கி சிக்ஸராக பறக்கவிட்டு பிரசாந்த் வீர் ஹெலிகாப்டர் ஷாட் அடித்தார். மேலும், வெறும் 27 பந்துகளில் 5 சிக்ஸர்கள் மற்றும் 3 பவுண்டரிகளுடன் 50 ரன்கள் விலாசி அசத்திய அவர், பந்துவீச்சிலும் 3 ஓவர்களில் 13 ரன்கள் மட்டுமே விட்டுக்கொடுத்து 1 விக்கெட்டையும் கைப்பற்றி பல்துறை திறமையை நிரூபித்தார்.
கடந்த ஐபிஎல் ஏலத்தில் மிகப்பெரிய தொகைக்கு வாங்கப்பட்ட போதிலும், 2026 சீசனில் பிரசாந்த் வீருக்கு போதிய வாய்ப்புகள் கிடைக்கவில்லை என்ற விமர்சனங்கள் இருந்தன. இருப்பினும், தோனியின் பாணியிலேயே அழுத்தமான சூழலில் ஹெலிகாப்டர் ஷாட் அடிக்கும் நுட்பமும், போட்டியின் போக்கையே மாற்றும் அவரது ஆல்ரவுண்ட் ஆட்டமும், சிஎஸ்கே அணிக்கு வருங்காலத்தில் ரவீந்திர ஜடேஜாவிற்குப் பொருத்தமான மாற்றாக அவர் இருப்பார் என்பதை மீண்டும் உறுதிப்படுத்தியுள்ளது.
இவரது இந்தத் தொடர் அதிரடி ஆட்டத்தைக் கண்டு ஈர்க்கப்பட்டுள்ள சென்னை சூப்பர் கிங்ஸ் நிர்வாகம், வரவிருக்கும் 2027 ஐபிஎல் சீசனுக்கான ஏலத்திற்கு முன்பாகவே பிரசாந்த் வீரை அணியில் தக்கவைத்துக்கொள்ள (Retain) முடிவு செய்துள்ளதாகத் தகவல்கள் வெளியாகியுள்ளன. தல தோனியின் வழிகாட்டுதலில் தயாராகி வரும் பிரசாந்த் வீரின் இந்த வீடியோ காட்சிகள் தற்போது சமூக வலைதளங்களில் வைரலாகி வருகின்றன.
