இங்கிலாந்தின் கிழக்குக் கடலோரப் பகுதியான ‘தி வாஷ்’ (The Wash) என்ற பகுதிக்கு அடியில், சுமார் 45.4 கோடி ஆண்டுகளுக்கு முன்பு 10 லட்சம் அணு குண்டுகள் ஒரே நேரத்தில் வெடித்ததற்குச் சமமான ஆற்றலுடன் வெடித்துச் சிதறிய ஒரு பிரம்மாண்ட சூப்பர் எரிமலையை (Supervolcano) விண்வெளி மற்றும் நிலவியல் விஞ்ஞானிகள் தற்பொழுது கண்டுபிடித்துள்ளனர். நவீன இத்தாலியின் எட்னா (Mount Etna) எரிமலையை விடப் பல ஆயிரம் மடங்கு அதிக வீரியம் கொண்ட இந்த எரிமலையின் கண்டுபிடிப்பு, இங்கிலாந்தின் பழமையான புவியியல் வரலாற்றையே மாற்றியமைத்துள்ளது.
சுமார் 64 கிலோமீட்டருக்கும் (40 மைல்கள்) அதிகமான பரப்பளவைக் கொண்ட இந்த மாபெரும் எரிமலை வெடித்த போது, அதிலிருந்து வெளிவந்த சாம்பல் மற்றும் பாறைத் துகள்கள் நூற்றுக்கணக்கான கிலோமீட்டர் தூரத்திற்குப் பரவியுள்ளன. தற்போதைய ஸ்வீடன், நார்வே, போலந்து மற்றும் பெலாரஸ் ஆகிய ஐரோப்பிய நாடுகளின் நிலப்பரப்பு வரை இந்த எரிகல் சாம்பல் படலங்கள் பரவிப் படிந்திருப்பதை ஆஸ்லோ பல்கலைக்கழக மற்றும் பிரிஸ்டல் பல்கலைக்கழக ஆராய்ச்சியாளர்கள் ஆய்வு மூலம் உறுதிப்படுத்தியுள்ளனர்.
கொரோனா ஊரடங்கு காலத்தில் புதிய பாறை மாதிரிகளைச் சேகரிக்க முடியாத சூழலில், சுமார் 80 ஆண்டுகளுக்கு முன்பு நோர்ஃபோக் (Norfolk) மற்றும் லின்கன்ஷயர் (Lincolnshire) பகுதிகளில் சேகரிக்கப்பட்டுப் பாதுகாக்கப்பட்ட பழைய பாறை மாதிரிகளைப் புதிய நுட்பங்கள் மூலம் ஆய்வு செய்த போதே இந்த ஆச்சரியமூட்டும் உண்மை வெளிச்சத்திற்கு வந்தது. மனித தலைமுடியின் தடிமனை விடச் சிறியதாக இருக்கும் ‘ஜிர்கான்’ (Zircon) படிகங்களை நவீனத் தொழில்நுட்பத்தைப் பயன்படுத்தி ஆய்வு செய்ததில், இவை ஒரே காலகட்டத்தில் உருவானவை என்பது நிரூபிக்கப்பட்டது.
இந்த அதிபயங்கர எரிமலை மீண்டும் வெடிக்குமா என்ற அச்சம் பொதுமக்கள் மத்தியில் எழுந்த நிலையில், பிரிட்டிஷ் புவியியல் ஆய்வு மையத்தின் (BGS) நிபுணர்கள் அதற்குத் தெள்ளத்தெளிவான விளக்கமளித்துள்ளனர். “நில அதிர்வுப் பிளவுகளைப் போல அல்லாமல், ஒருமுறை முழுமையாக அழிந்துபோன (Extinct) எரிமலை மீண்டும் ஒருபோதும் உயிர்த்தெழாது” என்றும், இதனால் தற்காலத்தில் எவ்விதப் பாதிப்பும் ஆபத்தும் ஏற்படாது என்றும் கூறி நிபுணர்கள் அமைதிப்படுத்தியுள்ளனர்.
