சென்னை கொளத்தூர் தொகுதியின் தமிழக வெற்றிக் கழக (தவெக) சட்டமன்ற உறுப்பினரான வி.எஸ். பாபுவுக்குத் திடீரெனக் கடுமையான மூச்சுத்திணறல் ஏற்பட்டதைத் தொடர்ந்து, அவர் சென்னையில் உள்ள தனியார் மருத்துவமனையில் அனுமதிக்கப்பட்டு தீவிர சிகிச்சைப் பிரிவில் சேர்க்கப்பட்டுள்ளார். அவரது உடல்நிலை குறித்து மருத்துவமனை நிர்வாகம் தற்போது அதிகாரப்பூர்வ மருத்துவ அறிக்கையை வெளியிட்டுள்ளது.
கடந்த மே மாதம் நடைபெற்ற சட்டப்பேரவைத் தேர்தலில் கொளத்தூர் தொகுதியில் தவெக சார்பில் போட்டியிட்டு வெற்றி பெற்ற வி.எஸ். பாபு, சமீபத்தில் நிறைவடைந்த சட்டமன்ற பட்ஜெட் கூட்டத்தொடரில் தீவிரமாகப் பங்கேற்று வந்தார். இத்தகைய சூழலில், நேற்று (செப்டம்பர் 9) அவருக்குத் திடீரெனச் சுவாசக் கோளாறு ஏற்பட்டதால் சென்னை அமைந்தகரையில் உள்ள எம்.ஜி.எம் ஹெல்த்கேர் (MGM Healthcare) மருத்துவமனையில் அவசரப் பிரிவில் அனுமதிக்கப்பட்டார்.
எம்.ஜி.எம் மருத்துவமனை நிர்வாகம் வெளியிட்டுள்ள அறிக்கையில், “தமிழகச் சட்டமன்ற உறுப்பினர் வி.எஸ். பாபு சுவாசக் கோளாறு காரணமாகச் செப்டம்பர் 9-ஆம் தேதி மருத்துவமனையில் அனுமதிக்கப்பட்டார். அவர் தற்போது தீவிர சிகிச்சைப் பிரிவில் (ICU) மருத்துவ நிபுணர்களின் பல்துறை குழுவின் கண்காணிப்பில் உள்ளார். அவருக்குத் தேவையான மருத்துவ மேலாண்மை மற்றும் சுவாச ஆதரவு (Respiratory Support) வழங்கப்பட்டு வருகிறது” எனத் தெரிவிக்கப்பட்டுள்ளது.
மேலும், தேவையான ஆதரவு சிகிச்சைகளுடன் வி.எஸ். பாபுவின் உடல்நிலை தற்போது சீராகவும் நிலையானதாகவும் (Stable) உள்ளது என்றும், மருத்துவர்களின் தொடர் கண்காணிப்பில் அவர் இருந்து வருகிறார் என்றும் அறிக்கையில் குறிப்பிடப்பட்டுள்ளது. இன்னும் சில தினங்கள் மருத்துவமனையில் தங்கிச் சிகிச்சை பெற்ற பின் அவர் வீடு திரும்புவார் என எதிர்பார்க்கப்படும் நிலையில், தவெக தொண்டர்களும் ஆதரவாளர்களும் அவர் விரைவில் நலம்பெற வேண்டுகோள் விடுத்து வருகின்றனர்.
