தமிழ்நாடு முதலமைச்சர் சி. ஜோசப் விஜய் மற்றும் சட்டத்துறை அமைச்சர் நிர்மல்குமார் ஆகியோரின் நற்பெயருக்குக் களங்கம் விளைவிக்கும் வகையில் அவதூறாகப் பேசியதாக திமுக நாடாளுமன்ற உறுப்பினர் ஏ. ராஜா, முன்னாள் அமைச்சர் பி.கே. சேகர்பாபு மற்றும் எம்.ஆர்.கே. பன்னீர்செல்வம் உள்ளிட்ட முன்னணித் தலைவர்கள் மீது காவல் துறையில் முறைப்படி வழக்குப் பதிவு செய்யப்பட்டுள்ளது.
சமீபத்தில் நடைபெற்ற சட்டமன்றக் கூட்டத்தொடரின் போது, திமுக ஆட்சிக்கால ஊழல்கள் மற்றும் சர்க்காரியா கமிஷன் அறிக்கைகளைக் குறிப்பிட்டு முதலமைச்சர் விஜய் உரையாற்றினார். இதைக் கண்டித்துச் சென்னையில் திமுக சார்பில் கண்டன ஆர்ப்பாட்டம் நடைபெற்றது. இந்த ஆர்ப்பாட்டத்தின் போது, முதலமைச்சர் மற்றும் அமைச்சர்களை தனிப்பட்ட முறையில் அவமதிக்கும் வகையிலும், பொது அமைதிக்குக் குந்தகம் விளைவிக்கும் வகையிலும் திமுக தலைவர்கள் பேசியதாகக் குற்றச்சாட்டு எழுந்தது.
இதனைத் தொடர்ந்து, தவெக திருவள்ளூர் வடக்கு மாவட்டச் செயலாளரும் கும்மிடிப்பூண்டி சட்டமன்ற உறுப்பினருமான விஜயகுமார், கட்சி நிர்வாகிகளுடன் சென்று கும்மிடிப்பூண்டி காவல்துறை துணைக் கண்காணிப்பாளர் (DSP) அலுவலகத்தில் வீடியோ ஆதாரங்களுடன் புகார் அளித்தார். இந்த புகாரில், திமுக தலைவர்களின் பேச்சுக்கள் சமூக நல்லிணக்கத்தைச் சீர்குலைக்கும் வகையில் அமைந்துள்ளதால் அவர்கள் மீது சட்டப்படி கடும் நடவடிக்கை எடுக்க வேண்டும் எனக் கோரப்பட்டது.
புகாரைப் பெற்றுக்கொண்ட காவல்துறையினர், பி.கே. சேகர்பாபு உள்ளிட்ட திமுக நிர்வாகிகள் மீது வழக்குப் பதிவு செய்து முதற்கட்ட விசாரணையைத் தொடங்கியுள்ளனர். சட்டமன்றக் கூட்டத்தொடரில் எழுந்த காரசார விவாதங்களைத் தொடர்ந்து, தமிழகத்தில் ஆளும்கட்சியான தவெகவிற்கும் எதிர்க்கட்சியான திமுகவிற்கும் இடையே அரசியல் மோதல்களும் சட்டப் போராட்டங்களும் மேலும் தீவிரமடைந்துள்ளன.
