அக்டோபர் 6-ஆம் தேதி நடைபெறவுள்ள தாராபுரம் (எஸ்சி) சட்டமன்றத் தொகுதி இடைத்தேர்தலில் போட்டியிடும் ஆளும்கட்சியான தமிழக வெற்றிக் கழகத்தின் (தவெக) வேட்பாளர் பி. சத்யபாமா மீது 3 குற்றவியல் வழக்குகள் நிலுவையில் உள்ள நிலையில், அவருக்கு மீண்டும் வாய்ப்பு வழங்கப்பட்டதற்கானக் காரணங்களைத் தவெக தலைமை அதிகாரப்பூர்வ ஆவணங்கள் மூலம் வெளியிட்டுள்ளது.
தாராபுரம் தொகுதியின் முன்னாள் சட்டமன்ற உறுப்பினரான சத்யபாமா, அதிமுகவில் இருந்து விலகி தவெகவில் இணைந்ததைத் தொடர்ந்து இத்தொகுதிக்கு இடைத்தேர்தல் அறிவிக்கப்பட்டது. வேட்புமனுத் தாக்கலின் போது சமர்ப்பிக்கப்பட்ட தேர்தல் உறுதிமொழிப் பத்திரத்தின் மூலம், அவர் மீது 3 குற்றவியல் வழக்குகள் நிலுவையில் இருப்பது தெரியவந்தது. இது குறித்து அரசியல் வட்டாரங்களில் விமர்சனங்கள் எழுந்த நிலையில், வேட்பாளர் தேர்வில் குற்றப் பின்னணி இல்லாத மாற்று வேட்பாளர்களும் பரிசீலிக்கப்பட்டதாக தவெக விளக்கியுள்ளது.
மாற்று வேட்பாளர்களை விட சத்யபாமாவிடம் உள்ள அடிமட்ட அரசியல் அனுபவம், மக்கள் மத்தியில் உள்ள செல்வாக்கு, கள நிர்வாகத் திறன், தலைமைத்துவப் பண்பு மற்றும் தொகுதி மக்களுடனான நெருங்கிய சமூகத் தொடர்பு ஆகியவை மிகக் கூடுதலாக இருப்பதாக தவெக தலைமை தெரிவித்துள்ளது. இதன் காரணமாகவே நிலுவை வழக்குகளைத் தாண்டி, தொகுதி மக்களின் நம்பிக்கையைப் பெற்ற சத்யபாமாவுக்கு மீண்டும் வேட்பாளராகப் போட்டியிடத் தலைமை வாய்ப்பளித்ததாக விளக்கமளிக்கப்பட்டுள்ளது.
வேட்புமனுக்கள் பரிசீலனை மற்றும் வேட்பாளர் இறுதிப்பட்டியல் வெளியீடு நெருங்கி வரும் நிலையில், தவெக முன்வைத்துள்ள இந்த விளக்கம் தாராபுரம் இடைத்தேர்தல் களத்தில் அரசியல் விவாதங்களை மேலும் தீவிரப்படுத்தியுள்ளது. முதலமைச்சர் விஜய்யின் ‘மதச்சார்பற்ற சமூகநீதி வெற்றிக் கூட்டணி’ சார்பில் போட்டியிடும் சத்யபாமா, எதிர்த்துப் போட்டியிடும் திமுக மற்றும் அதிமுக வேட்பாளர்களைக் காட்டிலும் அதிக வாக்குகள் வித்தியாசத்தில் வெற்றி பெறுவார் என்ற நம்பிக்கையைத் தவெக தொண்டர்கள் வெளிப்படுத்தி வருகின்றனர்.
