ஐக்கிய நாடுகள் சபையின் பொதுச்சபைக் கூட்டத்தொடரில் உரையாற்றிய உக்ரைன் அதிபர் வோலோடிமிர் ஜெலென்ஸ்கி (Volodymyr Zelenskyy), போர்க்களத்தில் தன்னாட்சி அதிகாரம் கொண்ட செயற்கை நுண்ணறிவு (AI) ஆயுதங்கள் முழுமையாகப் பயன்படுத்தப்படுவதற்கு முன்பாக உக்ரைன் – ரஷ்யப் போரை உடனடியாக முடிவுக்குக் கொண்டுவர வேண்டும் என உலக நாடுகளுக்குக் கடும் எச்சரிக்கை விடுத்துள்ளார்.
ஐநா பொதுச்சபை மேடையில் உலகத் தலைவர்கள் மத்தியில் உரையாற்றிய அதிபர் ஜெலென்ஸ்கி, தற்போதைய நவீனப் போர்களில் ட்ரோன்கள் மற்றும் வழிநடத்தப்படும் ஏவுகணைகளின் பங்கு அதிகரித்து வருவதைச் சுட்டிக்காட்டினார். மனிதர்களின் கட்டுப்பாடின்றித் தாமாகவே இலக்குகளைத் தேர்ந்தெடுத்துத் தாக்கும் அதிநவீன ஏஐ தொழில்நுட்ப ஆயுதங்கள் போர்க்களத்தில் கட்டுப்பாடின்றிப் பரவத் தொடங்கினால், அது ஒட்டுமொத்த மனிதகுலத்தின் பாதுகாப்பிற்கும் பேரழிவை ஏற்படுத்தும் என அவர் கவலை தெரிவித்தார்.
தொழில்நுட்ப வளர்ச்சியானது பேரழிவு ஆயுதங்களை உருவாக்குவதற்குக் காரணியாக மாறக் கூடாது எனக் குறிப்பிட்ட அவர், உக்ரைன் நாட்டில் தொடரும் போரானது ஏஐ அடிப்படையிலான ஆயுதச் சோதனைகளுக்கான களமாக மாற்றப்படுவதைத் தடுக்க சர்வதேச சமூகம் உடனடியாக நடவடிக்கை எடுக்க வேண்டும் எனக் கேட்டுக்கொண்டார். ரஷ்யாவின் தொடர் அணுஆயுத அச்சுறுத்தல்கள் மற்றும் உள்கட்டமைப்புத் தாக்குதல்களுக்கு எதிராக உலக நாடுகள் ஒன்றிணைந்து உக்ரைனுக்குத் தேவையான அமைதித் திட்டத்தை உருவாக்க வலியுறுத்தினார்.
ஐநா மேடையில் ஜெலென்ஸ்கி விடுத்துள்ள இந்த எச்சரிக்கை, எதிர்கால அணுஆயுத மற்றும் தொழில்நுட்பப் போர்கள் குறித்த சர்வதேச விவாதங்களை மீண்டும் தீவிரப்படுத்தியுள்ளது. ஏஐ தொழில் நுட்பத்தை ராணுவத்தில் பயன்படுத்துவதைக் கட்டுப்படுத்த சர்வதேச அளவிலான கடுமையான சட்டங்கள் மற்றும் ஒப்பந்தங்கள் உடனடியாக உருவாக்கப்பட வேண்டும் என்ற கோரிக்கையும் சர்வதேச அமைதி விரும்பிகள் மத்தியில் வலுத்து வருகிறது.
