செயற்கை நுண்ணறிவு (AI) தொழில்நுட்பத்திற்கு சட்டரீதியான கட்டுப்பாடுகளை உடனடியாக விதிக்காவிட்டால், தவறான மனிதர்களின் கைகளில் சிக்கி 100 கோடி பேர் வரை உயிரிழக்கும் அபாயம் உள்ளதாக மைக்ரோசாப்ட் நிறுவனத்தின் இணை நிறுவனர் பில் கேட்ஸ் எச்சரிக்கை விடுத்துள்ளார். தவறு செய்யும் எண்ணம் கொண்ட நபர்களுடன் நவீன ஏஐ கருவிகள் இணைவது பேரழிவை ஏற்படுத்தும் என்றும், இதுவரை மனிதகுலம் கண்டிராத மிக சக்திவாய்ந்த ஆயுதமாக இது உருவெடுத்துள்ளதாகவும் அவர் சுட்டிக்காட்டினார்.
ஏஐ தொழில் நிறுவனங்கள் தங்களை தாங்களே கட்டுப்படுத்திக் கொள்ளும் சுய கட்டுப்பாடு (self-regulation) முறை போதுமானது அல்ல என்றும், மத்திய சட்டமியற்றுபவர்களும் காவல்துறையும் இதில் நேரடியாக தலையிட வேண்டும் என்றும் பில் கேட்ஸ் வலியுறுத்தினார். உயிரி ஆயுதங்களை உருவாக்குதல், மின் உள்கட்டமைப்புகளை முடக்குதல் மற்றும் பெரிய அளவிலான சைபர் தாக்குதல்களை நடத்துதல் போன்ற ஆபத்தான எல்லைகளை இந்த தொழில்நுட்பம் கடந்து வருவதாக அவர் கவலை தெரிவித்தார். அரசாங்கங்களிடம் ஏஐ ஆபத்துகளை எதிர்கொள்ள தேவையான தொழில்நுட்ப நிபுணத்துவம் குறைவாக இருப்பதை சுட்டிக்காட்டிய அவர், உடனடி கண்காணிப்பு அமைப்புகள் தேவை என கேட்டுக்கொண்டார்.
ஏஐ ஆபத்துகள் குறித்த அச்சங்களை அமெரிக்க அதிபர் டொனால்ட் டிரம்ப் “ஏமாற்று வேலை” என கூறியிருந்த நிலையில், கேட்ஸ் அதற்கு மறுப்பு தெரிவித்து, உலகளாவிய ஒப்பந்தங்கள் அவசியமானவை என தெரிவித்துள்ளார். மேலும், ஆபத்து ஏற்படும் போது ஏஐ-ஐ நிறுத்துவதற்கான ‘கில் ஸ்விட்ச்’ (kill switch) எனும் அம்சம் மட்டும் ஒட்டுமொத்த பாதுகாப்பிற்கு போதுமானதாக இருக்காது என்றும் அவர் குறிப்பிட்டார். உலகின் முன்னணி தொழில்நுட்ப நிறுவனங்களான ஓபன் ஏஐ மற்றும் அன்த்ரோபிக் ஆகியவற்றின் அமைப்புகள் அண்மையில் இணைய பாதுகாப்பு அச்சுறுத்தல்களுக்கு உள்ளான சம்பவங்களை அடுத்து, உலக அளவில் ஏஐ கட்டுப்பாடுகள் குறித்த விவாதங்கள் தீவிரமடைந்துள்ளன.
செயற்கை நுண்ணறிவு வளர்ச்சியால் லட்சக்கணக்கான பணியிடங்கள் பாதிக்கப்படும் அபாயம் உள்ளதால், சில குறிப்பிட்ட வேலைகளை “மனிதர்களுக்கே உரியவை” என அரசாங்கங்கள் சட்டப்பூர்வமாக அறிவிக்க வேண்டும் என்றும் கேட்ஸ் யோசனை தெரிவித்துள்ளார். ஏஐ தொழில் நிறுவனங்களுக்கு சட்டரீதியான கட்டுப்பாடுகளை விதிப்பது சிறிய அளவிலான செலவினங்களை மட்டுமே அதிகரிக்கும் என்றும், அது கண்டுபிடிப்புகளை பெரிய அளவில் தடுத்துவிடாது என்றும் அவர் தெளிவுபடுத்தியுள்ளார். அமெரிக்க அரசு இந்த விவகாரத்தில் உலக நாடுகளுக்கு முன்னோடியாக செயல்பட்டு தேவையான அவசர சட்டங்களை இயற்ற வேண்டும் என்று தொழில்நுட்ப வல்லுநர்கள் எதிர்பார்க்கின்றனர்.
