ஐபிஎல் 2027 கிரிக்கெட் திருவிழாவிற்கான அணிகளை வலுப்படுத்தும் பணிகளில் உரிமையாளர்கள் தீவிரம் காட்டி வரும் நிலையில், சன்ரைசர்ஸ் ஐதராபாத் அணியின் முன்னணிப் பந்துவீச்சாளரான ஹர்ஷல் படேல் குஜராத் டைட்டன்ஸ் அணிக்கு மாற உள்ளதாகத் தகவல்கள் வெளியாகியுள்ளன. இதற்கான அனைத்துப் பணிகளும் முழுமை பெற்று வருவதாகவும், விரைவில் இது குறித்த அதிகாரப்பூர்வ அறிவிப்பு வெளியாகும் எனவும் எதிர்பார்க்கப்படுகிறது.
இதற்கு முன்பு 2025 மெகா ஏலத்தில் ரூ. 8 கோடி விலைக்குச் சன்ரைசர்ஸ் ஐதராபாத் அணியால் வாங்கப்பட்ட ஹர்ஷல் படேல், தற்போது ரொக்கப் பரிமாற்ற முறையில் (All-cash trade) ரூ. 4 கோடி மதிப்பீட்டில் குஜராத் அணிக்குக் கைமாறுகிறார். இந்தத் தொகையானது குஜராத் அணியின் ஒட்டுமொத்த ஏலத் தொகையில் இருந்து (Purse)க் குறைக்கப்படும் என்று கூறப்படுகிறது.
ஐபிஎல் கிரிக்கெட் அரங்கில் இரண்டு முறை ‘பர்பிள் கேப்’ (Purple Cap) வென்றவரான ஹர்ஷல் படேல், ஆர்சிபி, டெல்லி மற்றும் பஞ்சாப் போன்ற அணிகளைத் தொடர்ந்து ஐந்தாவதாகக் குஜராத் அணிக்காக விளையாட உள்ளார். கடந்த ஐபிஎல் தொடர்களில் தனது சிறப்பான பந்துவீச்சால் முத்திரை பதித்த அனுபவமிக்க இவரின் வருகை, குஜராத் டைட்டன்ஸ் அணியின் பந்துவீச்சுத் துறையை மேலும் வலுப்படுத்தும் என்று எதிர்பார்க்கப்படுகிறது.
ஐபிஎல் அணிகளுக்கான வீரர்களைத் தக்கவைக்கும் காலக்கெடு நெருங்கி வரும் சூழலில், இந்த அதிரடி டிரேடிங் நடவடிக்கை கிரிக்கெட் வட்டாரத்தில் பெரும் எதிர்பார்ப்பை ஏற்படுத்தியுள்ளது. குஜராத் அணியின் சொந்த மாநிலப் பின்னணியைக் கொண்ட ஹர்ஷல் படேலின் இந்த இடமாற்றம், அணியின் வியூகங்களில் முக்கியமானதாகப் பார்க்கப்படுகிறது.
