திருப்பூர் மாவட்டம் தாராபுரத்தில் நடைபெறும் தமிழக வெற்றிக் கழகத்தின் (தவெக) பிரச்சார நிகழ்ச்சியில் 5,000 நபர்களுக்கு மட்டுமே அனுமதி அளிக்கப்பட்டுள்ளதாக அக்கட்சியின் தலைமை நிலையச் செயலகம் அதிகாரப்பூர்வமாக அறிவித்துள்ளது. தாராபுரம் வட்டம் சித்ராவுத்தன்பாளையம் கிராமத்தில் உள்ள மாருதி நகரில் இந்த பிரச்சாரக் கூட்டம் நடைபெறுகிறது. கூட்ட நெரிசலைத் தவிர்க்கவும் பாதுகாப்பு நெறிமுறைகளைப் பின்பற்றவும் இந்த நடவடிக்கை எடுக்கப்பட்டுள்ளதாகக் கட்சித் தலைமை தெரிவித்துள்ளது.
காவல்துறையின் வழிகாட்டுதலின்படி, முன்கூட்டியே தேர்வு செய்யப்பட்டு QR குறியீட்டுடன் கூடிய நுழைவுச்சீட்டு வழங்கப்பட்டுள்ள 5,000 பேர் மட்டுமே நிகழ்ச்சிக்கு அனுமதிக்கப்படுவார்கள். நுழைவாயிலில் இந்த டிஜிட்டல் அனுமதிச் சீட்டு பரிசோதிக்கப்பட்ட பின்னரே மைதானத்திற்குள் செல்ல முடியும். QR அனுமதிச் சீட்டு இல்லாத பொதுமக்கள் மற்றும் கட்சித் தொண்டர்களுக்கு எந்தச் சூழ்நிலையிலும் அனுமதி வழங்கப்படாது என்றும் அறிவிப்பில் திட்டவட்டமாக தெரிவிக்கப்பட்டுள்ளது.
பாதுகாப்பு அம்சங்களைக் கருத்தில் கொண்டு கர்ப்பிணிப் பெண்கள், சிறுவர்-சிறுமியர், பள்ளி மாணவர்கள், மூத்த குடிமக்கள், மாற்றுத்திறனாளிகள் மற்றும் உடல்நலக் குறைவு உள்ளவர்களுக்கு நுழைவுச்சீட்டு வழங்கப்படவில்லை. எனவே, இவர்கள் பிரச்சார மைதானத்திற்கு வருவதைத் தவிர்க்குமாறு கேட்டுக்கொள்ளப்பட்டுள்ளனர். மேலும், பங்கேற்பாளர்களுக்காகக் குடிநீர் மற்றும் அவசர மருத்துவ வசதிகள் மைதானப் பகுதியில் தயார் நிலையில் வைக்கப்பட்டுள்ளன.
அனுமதிச் சீட்டு இல்லாத ஆதரவாளர்கள் மற்றும் பொதுமக்கள் நேரில் வராமல், தொலைக்காட்சி மற்றும் சமூக வலைத்தளங்களின் நேரலை வாயிலாக நிகழ்ச்சியைக் காணுமாறு அக்கட்சி வேண்டுகோள் விடுத்துள்ளது. தாராபுரத்தில் பிரச்சாரக் கூட்ட ஏற்பாடுகள் மாவட்ட நிர்வாகிகள் முன்னிலையில் தீவிரமாக நடைபெற்று வருகின்றன. காவல்துறையின் முழுமையான கட்டுப்பாடுகள் மற்றும் கண்காணிப்புடன் இந்த நிகழ்ச்சி நடைபெறவுள்ளது.
