உக்ரைன் இராணுவம் வான்வழியாக தரைவழி ரோபோக்களை இறக்கியும், அதிவேக இன்டர்செப்டார் ட்ரோன்களைப் பயன்படுத்தியும் ரஷ்யப் படைகளுக்கு எதிராகப் போரிட்டு வருகிறது.
ரஷ்யா உடனான போரில் உக்ரைன் இராணுவம் வான்வழியாக தரைவழி ரோபோக்களை (UGVs) இறக்கித் தாக்குதல் நடத்தும் புதிய உத்தியைக் கையாளத் தொடங்கியுள்ளது. ஹெவி பாம்பர் ட்ரோன்கள் மூலம் நான்கு சக்கர தரைவழி ரோபோக்கள் ரஷ்ய எல்லைக்குக் பின்புறம் 10 கிலோமீட்டருக்கும் அதிகமான தொலைவில் வான்வழியாக இறக்கப்பட்டன. இந்த ரோபோக்கள் மூலம் எதிரிப் படைகளின் இலக்குகள் வெற்றிகரமாகத் தாக்கப்பட்டதாகத் தெரிவிக்கப்பட்டுள்ளது.
அதேவேளையில், வான்வெளித் தற்காப்பைப் பலப்படுத்தும் வகையில் மணிக்கு சுமார் 370 கி.மீ (230 மைல்) வேகத்தில் செல்லக்கூடிய புதிய வகை இன்டர்செப்டார் ட்ரோன்களை உக்ரைன் களமிறக்கியுள்ளது. ‘ஸ்கைஃபால்’ நிறுவனத்தின் ‘P1-Sun’ போன்ற இன்டர்செப்டார் ட்ரோன்கள், ரஷ்யாவின் ஷாஹெட் ட்ரோன்களை வான்வெளியிலேயே இடைமறித்து அழிக்கும் திறன் கொண்டவையாக உருவாக்கப்பட்டுள்ளன. செப்டம்பர் 27 அன்று உக்ரைன் அதிபர் அலுவலகத்தின் அதிகாரி கைரிலோ புடானோவ், இத்தகைய இன்டர்செப்டார் ட்ரோன்களை அடுத்த சில மாதங்களில் பரவலாகப் பயன்பாட்டிற்கு கொண்டுவரத் திட்டமிட்டுள்ளதாகத் தெரிவித்தார்.
முன்னதாக செப்டம்பர் 25 அன்று உக்ரைன் பாதுகாப்பு அமைச்சகம் வெளியிட்ட தகவலின்படி, ஜனவரி முதல் செப்டம்பர் 2026 வரை உக்ரைன் இராணுவப் பிரிவுகள் 5,90,000-க்கும் அதிகமான ட்ரோன்களை ஆர்டர் செய்துள்ளன. இதில் எதிரி நாடுகளின் ட்ரோன்களை அழிக்கும் இன்டர்செப்டார் ட்ரோன்களே முதன்மை இடத்தில் இருப்பதாகக் கூறப்பட்டுள்ளது.
தற்போது உக்ரைன் தனது உள்நாட்டு பாதுகாப்பு தொழில்நுட்பத் துறை மூலம் வான் மற்றும் தரைவழி தன்னாட்சி அமைப்புகளின் உற்பத்தியை அதிகப்படுத்தி வருகிறது. மனித இழப்புகளைக் குறைக்கும் நோக்கில் இத்தகைய தானியங்கி ரோபோக்கள் மற்றும் ட்ரோன் அமைப்புகள் முன்னணிப் போர்க்களங்களில் அதிக அளவில் பயன்படுத்தப்பட்டு வருவதாக இராணுவ வட்டாரங்கள் தெரிவிக்கின்றன.
