தமிழ்நாட்டில் தாராபுரம் மற்றும் மதுராந்தகம் சட்டமன்றத் தொகுதிகளுக்கான இடைத்தேர்தல் களம் சூடுபிடித்துள்ள நிலையில், தமிழக வெற்றிக் கழகம் மீது இந்திய கம்யூனிஸ்ட் கட்சி (சிபிஐ) கடும் குற்றச்சாட்டுகளை முன்வைத்துள்ளது. தாராபுரத்தில் பிரச்சாரத்தின் போது பேசிய சிபிஐ மாநிலச் செயலாளர் மு.வீரபாண்டியன், தவெகவினர் வாக்காளர்களை மட்டுமல்லாமல் ஊரையுமே விலை பேசும் முயற்சியில் ஈடுபட்டு வருவதாகக் கூறி பரபரப்பை ஏற்படுத்தியுள்ளார்.
இடைத்தேர்தலில் இடதுசாரி கட்சிகள் தனித்து களமிறங்கியுள்ள சூழலில், பிரதான அரசியல் கட்சிகள் பணபலத்தையும் அதிகார பலத்தையும் தவறாகப் பயன்படுத்துவதாக இடதுசாரி தலைவர்கள் சாடி வருகின்றனர். “வாக்காளர்களுக்குத் தவெக பணத்தைக் கொடுத்து வளைக்கப் பார்க்கிறது; நாங்கள் மட்டுமே கொள்கைப் பூர்வமாகப் துண்டுப் பிரசுரங்களை வழங்கி வாக்கு சேகரித்து வருகிறோம்” என்று மு.வீரபாண்டியன் தனது உரையில் குறிப்பிட்டதாகத் தெரிவிக்கப்படுகிறது.
இடதுசாரி தலைவர்களின் இந்த விமர்சனங்கள் குறித்து தவெக தரப்பில் மறுப்பு தெரிவிக்கப்பட்டுள்ள நிலையில், தேர்தல் களத்தில் நேர்மையான முறையில் மட்டுமே தங்களது பிரச்சாரம் நடைபெறுவதாக அக்கட்சியினர் தரப்பில் வலியுறுத்தப்படுகிறது. வாக்காளர்களைக் கவர பல்வேறு தரப்பினரும் தீவிர முயற்சிகளை மேற்கொண்டு வருவதால், தொகுதி முழுவதும் அரசியல் களம் பரபரப்பாகக் காணப்படுகிறது.
தேர்தல் ஆணையம் இதுபோன்ற குற்றச்சாட்டுகள் குறித்துக் கண்காணிப்பை தீவிரப்படுத்த வேண்டும் என பல்வேறு அமைப்புகள் கோரிக்கை விடுத்துள்ளன. இரு தொகுதிகளிலும் பிரச்சாரம் இறுதி கட்டத்தை எட்டியுள்ள நிலையில், வாக்காளர்களின் ஆதரவு யாருக்கு என்பது தேர்தல் முடிவுகளின் போது தெரியவரும்.
