மத்திய கிழக்கின் முக்கிய கடல்வழிப்பாதையான ஹார்முஸ் ஜலசந்தி (Strait of Hormuz) வழியே சென்று கொண்டிருந்த எண்ணெய் மற்றும் திரவமாக்கப்பட்ட இயற்கை எரிவாயு (LNG) கப்பல்கள் மீது அடையாளம் தெரியாத பொருள்கள் பாய்ந்து தாக்குதல் நடத்தப்பட்டுள்ளன. இந்தத் தாக்குதலில் கப்பல் ஒன்றில் லேசான தீ விபத்தும் மின்சாரத் தடையும் ஏற்பட்டது. ‘ராய்ட்டர்ஸ்’ மற்றும் ‘அனடோலு ஏஜென்சி’ ஆகிய செய்தி நிறுவனங்கள் இத்தகவலை உறுதிப்படுத்தியுள்ளன.
தாக்குதலுக்கு உள்ளான கப்பல்களில் ஏற்பட்ட தீ உடனடியாக அணைக்கப்பட்டு, கப்பல்கள் தங்களின் பயணத்தைத் தொடர்ந்து சென்றதாகக் கூறப்படுகிறது. இந்தச் சம்பவத்தில் பணியாளர்கள் எவருக்கும் காயங்களோ அல்லது சுற்றுச்சூழலுக்குப் பாதிப்போ ஏற்படவில்லை என முகமை தெரிவித்துள்ளது. தாக்குதலுக்கு இதுவரை எந்தவொரு அமைப்பும் பொறுப்பேற்காத நிலையில், இதுகுறித்து அதிகாரிகள் தீவிர விசாரணை நடத்தி வருகின்றனர்.
அமெரிக்கா மற்றும் ஈரானுக்கு இடையே கப்பல் போக்குவரத்து தொடர்பாகவும் ஹார்முஸ் ஜலசந்தியின் பாதுகாப்பு குறித்தும் நிலவி வரும் தொடர் மோதல் போக்கிற்கு இடையே இச்சம்பவம் நிகழ்ந்துள்ளது. உலகளாவிய எரிபொருள் விநியோகத்தில் ஐந்தில் ஒரு பங்கு இந்த ஹார்முஸ் கடல்வழிப்பாதை வழியாகவே கடந்து செல்வதால், இங்கு நிகழும் தாக்குதல்கள் சர்வதேச நாடுகளிடையே கவலையை ஏற்படுத்தியுள்ளன.
ஹார்முஸ் ஜலசந்தியில் தொடரும் பதற்றமான சூழலைக் கருத்தில் கொண்டு, அப்பகுதியில் பயணிக்கும் வணிகக் கப்பல்கள் எச்சரிக்கையுடன் செயல்பட கடல்சார் பாதுகாப்பு அமைப்புகள் அறிவுறுத்தியுள்ளன. தாக்குதலுக்குள்ளான கப்பல்களின் விவரங்கள் மற்றும் பின்னணி குறித்த கூடுதல் தகவல்களைச் சேகரிக்கும் பணியில் சர்வதேச புலனாய்வு அமைப்புகள் ஈடுபட்டுள்ளன.
