உக்ரைன் தலைநகர் கியிவில் அமைந்துள்ள வடக்கு பாலம் (Northern Bridge) மீது ரஷ்யா நடத்திய ட்ரோன் தாக்குதலில் இருவர் காயமடைந்துள்ளதாக கியிவ் மேயர் விட்டாலி கிளிட்ச்கோ தெரிவித்துள்ளார்.பகல் நேரத்தில் வாகனப் போக்குவரத்து அதிகமாக இருந்த சமயத்தில் இந்தத் தாக்குதல் நடத்தப்பட்டுள்ளது. டினிப்ரோ நதியைக் கடக்கும் இந்த முக்கிய பாலத்தின் மீது ட்ரோன் விழுந்து வெடித்ததில் பெரியளவில் தீப்பந்தமும் புகையும் எழும்பியது சமூக வலைதளங்களில் வெளியாகியுள்ளது.
ஜெர்மன் சான்சலர் ஃபிரெட்ரிச் மெர்ஸ் உக்ரைன் அதிபர் வோலோடிமிர் செலென்ஸ்கியைச் சந்திக்கக் கியிவ் நகருக்கு வருகை தந்திருந்த வேளையிலேயே இந்தத் தாக்குதல் இடம்பெற்றுள்ளது. தாக்குதலின் போது பாலத்தின் மீது கார்கள் வழக்கம்போல் இயங்கிக் கொண்டிருந்த நிலையில், ட்ரோன் நேரடியாக வீதிப் பகுதியில் மோதி வெடித்தது. இந்தத் தாக்குதலால் பாலத்தின் சாலைப் பகுதி சேதமடைந்த போதிலும், கட்டமைப்பிற்குப் பெரியளவிலான ஆபத்து எதுவும் ஏற்படவில்லை என முதற்கட்ட ஆய்வுக்குப் பின் அதிகாரிகள் தரப்பில் தெரிவிக்கப்பட்டுள்ளது.
ஜெர்மன் சான்சலருடன் சேதமடைந்த இடங்களை பார்வையிட்ட உக்ரைன் அதிபர் செலென்ஸ்கி, பொதுமக்கள் மீதான இத்தகைய தாக்குதல்கள் நிறுத்தப்பட வேண்டும் என்று வலியுறுத்தினார். உக்ரைனின் உள்கட்டமைப்புகளையும் போக்குவரத்து நெட்வொர்க்குகளையும் இலக்கு வைத்து ரஷ்யா தொடர்ந்து தாக்குதல்களை நடத்தி வருவதாக உக்ரைனிய அதிகாரிகள் குற்றம் சாட்டியுள்ளனர்.
தாக்குதலைத் தொடர்ந்து சம்பவ இடத்திற்கு விரைந்த அவசரகால மீட்புக் குழுவினர் காயமடைந்த இருவருக்கும் முதலுதவி அளித்து மருத்துவமனைக்கு அனுப்பி வைத்தனர். பாலத்தில் தற்காலிகமாகப் போக்குவரத்து நிறுத்தப்பட்டுச் சீரமைப்புப் பணிகள் மேற்கொள்ளப்பட்ட நிலையில், தற்போது நிலைமை தீவிரமாகக் கண்காணிக்கப்பட்டு வருகிறது.
