இந்திய தேர்தல் ஆணையம் மேற்கொண்டு வரும் வாக்காளர் சிறப்பு தீவிர திருத்த (SIR) நடவடிக்கையின் மூலம் சென்னையில் மட்டும் சுமார் 14 லட்சம் வாக்காளர்களின் பெயர்கள் வாக்காளர் பட்டியலிலிருந்து நீக்கப்பட்டுள்ளதாக திமுக முன்னாள் அமைச்சரும் துறைமுகம் தொகுதி எம்.எல்.ஏ-வுமான பி.கே. சேகர்பாபு குற்றம் சாட்டியுள்ளார். சென்னையில் செய்தியாளர்களைச் சந்தித்த அவர், தேர்தல் ஆணையத்தின் இந்த நடவடிக்கை ஜனநாயக விரோதமானது என்று விமர்சித்தார்.
செய்தியாளர்கள் சந்திப்பில் பேசிய சேகர்பாபு, வாக்காளர் பட்டியலில் மேற்கொள்ளப்பட்ட மாற்றங்கள் மூலம் சென்னையில் உள்ள மொத்த வாக்காளர்களில் சுமார் 35 சதவீதம் பேர் நீக்கப்பட்டுள்ளதாகத் தெரிவித்தார். ஒன்றிய அரசின் வழிகாட்டுதலின்படி செயல்படுத்தப்படும் இந்த சிறப்பு தீவிர திருத்த நடவடிக்கையை, தமிழகம் போன்ற மாநிலங்களின் ஜனநாயக உரிமைகள் மீது தொடுக்கப்பட்ட தாக்குதலாகவே பார்க்க வேண்டியுள்ளது என்று அவர் சுட்டிக்காட்டினார்.
இவ்விவகாரத்தில் டெல்லியில் எதிர்க்கட்சிகள் பேரணி நடத்தி வரும் சூழலில், இத்திட்டம் கொண்டுவரப்பட்டபோதே திமுக தலைவர் மு.க. ஸ்டாலின் இதற்குத் தனது கடுமையான எதிர்ப்பைப் பதிவு செய்திருந்தார் என்பதைச் சேகர்பாபு நினைவுகூர்ந்தார். ஒரே நேரத்தில் இவ்வளவு பெரிய எண்ணிக்கையிலான வாக்காளர்களின் பெயர்கள் நீக்கப்பட்டிருப்பது பொதுமக்கள் மத்தியில் பெரும் குழப்பத்தையும் சந்தேகத்தையும் ஏற்படுத்தியுள்ளதாக அவர் குறிப்பிட்டார்.
வாக்காளர் பட்டியலிலிருந்து தகுதியான வாக்காளர்களின் பெயர்கள் விடுபடாமல் இருப்பதை உறுதி செய்ய உரிய ஆய்வுகளை உடனடியாக மேற்கோள்ள வேண்டும் எனக் கோரப்பட்டுள்ளது. நீக்கப்பட்ட வாக்காளர்கள் மீண்டும் தங்களது பெயர்களை பட்டியலில் சேர்க்கத் தேவையான மேல்முறையீட்டு நடவடிக்கைகளைத் தொடங்குவது குறித்து திமுக சட்டப் பிரிவு ஆலோசனை நடத்தி வருகிறது.
