பல்ஜியத்தின் பிரஸ்ஸல்ஸ் நகரில் நடைபெற்ற ஐரோப்பிய ஒன்றியத் தலைவர்களின் உச்சிமாநாட்டில் பங்கேற்றுப் பேசிய பிரான்ஸ் அதிபர் இம்மானுவேல் மெக்ரான், வரவிருக்கும் தேர்தல்கள் காரணமாகப் பேச்சுவார்த்தைகள் மேலும் கடினமாகும் எனக் குறிப்பிட்டுள்ளார். குறிப்பாக 2027ஆம் ஆண்டில் பிரான்ஸ் உட்படப் பல ஐரோப்பிய நாடுகளில் தேர்தல்கள் நடைபெறவுள்ளதால், அதற்குள் இந்த நிதி ஒதுக்கீட்டு ஒப்பந்தத்தை இறுதி செய்வது மிகவும் அவசியமானது என்று அவர் சுட்டிக்காட்டியுள்ளார். ஏழாண்டு காலத்திற்கான இந்த வரவுசெலவுத் திட்டத்தை நடைமுறைப்படுத்த அனைத்து உறுப்பு நாடுகளின் ஒருமனதான ஒப்புதல் தேவை என்பதால் விரிவான ஆலோசனைகள் முன்னெடுக்கப்பட்டு வருகின்றன.
இந்த நிதியாண்டு திட்டமிடலில் கூடுதல் பங்களிப்பை வழங்கும் நாடுகளுக்கும், அதிக பயன்பாட்டைப் பெறும் நாடுகளுக்கும் இடையே சில கருத்து வேறுபாடுகள் நீடித்து வருகின்றன. இந்நிலையில், மெக்ரானின் கோரிக்கையைத் தொடர்ந்து நவம்பர் மாத இறுதியில் சிறப்பு உச்சிமாநாடு ஒன்றை நடத்தி பேச்சுவார்த்தைகளை வேகப்படுத்த ஐரோப்பிய கவுன்சில் தலைவர் அந்தோனியோ கோஸ்டா திட்டமிட்டுள்ளார். அடுத்த ஆண்டு ஜனவரி மாதத்திற்குப் பிறகு இதற்கான அரசியல் சூழல் மேலும் சிக்கலாகும் என்பதால் ஒப்பந்தத்தை விரைந்து முடிக்கப் பிற நாட்டு தூதர்களும் விருப்பம் தெரிவித்துள்ளனர்.
வரவுசெலவுத் திட்டத்தை இறுதி செய்வதில் ஏற்படும் தாமதம் ஐரோப்பிய ஒன்றியத்தின் எதிர்காலப் பாதுகாப்பு மற்றும் மேம்பாட்டுத் திட்டங்களை பாதிக்கும் எனக் கருதப்படுகிறது.
இதையடுத்து, நவம்பர் உச்சிமாநாட்டில் முக்கிய முடிவுகள் எடுக்கப்படும் என எதிர்பார்க்கப்படுகிறது.
