ஹவுதி கிளர்ச்சியாளர்களின் கட்டுப்பாட்டில் உள்ள தாயிஸ் (Taiz) மாகாணத்தில் உள்ள பொதுமக்களின் குடியிருப்புகளை இலக்காகக் கொண்டு சவூதி போர் விமானங்கள் தாக்குதல் நடத்தியதாக ஹவுதி ஊடகங்கள் செய்தி வெளியிட்டுள்ளன. இந்தத் திடீர் குண்டுவீச்சில் 9 பேர் சம்பவ இடத்திலேயே உயிரிழந்ததுடன், 16 பேர் காயமடைந்துள்ளதாகவும், இடிபாடுகளுக்குள் சிலர் சிக்கியுள்ளதாகவும் தெரிவிக்கப்பட்டுள்ளது. அதற்கு முன்னதாகத் தமார் (Dhamar) மாகாணத்தில் நடத்தப்பட்ட இரவோடு இரவிலான வான்வழித் தாக்குதலில் 3 குழந்தைகள் உயிரிழந்ததுடன் 17 பேர் காயமடைந்ததாகவும் ஹவுதி தரப்பில் தெரிவிக்கப்பட்டுள்ளது.
சர்வதேச அளவில் தடை செய்யப்பட்ட கிளஸ்டர் ரக வெடிகுண்டுகளைப் பயன்படுத்தி இந்தத் தாக்குதல்கள் நடத்தப்பட்டுள்ளதாக ஹவுதி செய்தி நிறுவனம் குற்றம் சாட்டியுள்ளது. கடந்த ஜூலை மாதம் முதல் மீண்டும் தீவிரமடைந்துள்ள இந்த மோதலில், செப்டம்பர் 3 முதல் அக்டோபர் 15 வரையிலான காலத்தில் சவூதி நடத்திய தாக்குதல்களில் 115 பேர் உயிரிழந்துள்ளனர். சர்வதேச அளவில் அங்கீகரிக்கப்பட்ட யேமன் அரசுக்கு ஆதரவாகச் சவூதி கூட்டுப் படைகள் தொடர்ந்து வான்வழித் தாக்குதல்களை நடத்தி வருகின்றன.
அதேவேளையில், ரியாத் உள்ளிட்ட நகரை நோக்கி ஹவுதி அமைப்பினால் ஏவப்பட்ட நான்கு ட்ரோன்களைத் தங்களது வான் பாதுகாப்புப் படைகள் வெற்றிகரமாக இடைமறித்துச் சுட்டு வீழ்த்தியதாகச் சவூதி கூட்டுப் படையின் செய்தித் தொடர்பாளர் துர்க்கி அல்-மாலிகி தெரிவித்துள்ளார்.
தொடர்ச்சியாக இரு தரப்பிற்கும் இடையே வான்வழித் தாக்குதல்கள் தீவிரமடைந்து வருவதால் பிராந்தியத்தில் பதற்றமான சூழ்நிலை நிலவுகிறது.
