ஏமனின் ஹவுதி கிளர்ச்சியாளர்கள் நடத்தி வரும் ஏவுகணை மற்றும் ட்ரோன் தாக்குதல்களிலிருந்து சவூதி அரேபியாவைப் பாதுகாக்கும் பொருட்டுத் தனது ‘ராயல் ஏர் ஃபோர்ஸ்’ டைபூன் (RAF Typhoon) போர் விமானங்களை பிரிட்டன் அனுப்பவுள்ளது. சவூதி அரேபியாவின் நகரங்கள், முக்கியச் சிவில் பகுதிகள் மற்றும் நாட்டின் முக்கியமான உள்கட்டமைப்பு வசதிகளைப் பாதுகாக்கும் நோக்கிலேயே இந்தப் போர் விமானங்கள் களமிறக்கப்படுகின்றன. செவ்வாய்க்கிழமை (அக்டோபர் 20) பிரிட்டன் பாதுகாப்பு அமைச்சகம் வெளியிட்ட அதிகாரப்பூர்வ அறிக்கையில் இந்தத் தகவல் உறுதிப்படுத்தப்பட்டுள்ளது.
ஹவுதி அமைப்பினர் சவூதி நிலப்பரப்புகளை இலக்கு வைத்து நடத்தி வரும் தொடர் தாக்குதல்கள் மிகவும் கண்டனத்திற்குரியவை என பிரிட்டன் பாதுகாப்புத்துறை அமைச்சர் வெஸ் ஸ்ட்ரீடிங் (Wes Streeting) தெரிவித்துள்ளார். பிரிட்டனின் இந்தப் போர் விமானங்கள் வான்வெளியில் வரும் ஏவுகணைகள் மற்றும் ட்ரோன்களைத் தடுத்து அழிக்கும் தற்காப்புப் பணிகளை மட்டுமே மேற்கொள்ளும் என்றும், ஏமனில் உள்ள ஹவுதி இலக்குகள் மீது நேரடித் தாக்குதல்களை நடத்தாது என்றும் தெளிவுபடுத்தப்பட்டுள்ளது. அத்துடன் இராணுவ தளவாடங்களை எடுத்துச் செல்லப் போக்குவரத்து விமானம் ஒன்றையும், சவூதி அதிகாரிகளுக்கு உதவ இராணுவ ஆலோசகர்களையும் பிரிட்டன் அனுப்ப உள்ளது.
சவூதி அரேபியாவின் தலைநகர் ரியாத்தில் உள்ள சர்வதேச விமான நிலையம் இந்த மாத தொடக்கத்தில் இருந்து பலமுறை இலக்கு வைக்கப்பட்டதாகக் தகவல்கள் தெரிவிக்கின்றன. சமீபத்தில் நடைபெற்ற தாக்குதலில் 13 பேர் உயிரிழந்ததாகவும், 300-க்கும் மேற்பட்டோர் காயமடைந்ததாகவும் அறிக்கைகள் கூறுகின்றன. வளைகுடா பகுதியில் அதிகரித்து வரும் இந்த வன்முறைச் சம்பவங்கள் ஆற்றல் விநியோகத்தைப் பாதித்து சர்வதேச அளவில் பொருளாதார நெருக்கடிகளை தீவிரப்படுத்துவதாகப் பிரிட்டன் கவலை தெரிவித்து உள்ளது.
முன்னதாகச் சவூதி விமானங்களுக்கு வழங்கப்பட்டு வந்த வான்வழி எரிபொருள் நிரப்பும் ஆதரவை மேலும் 90 நாட்களுக்கு நீட்டிப்பதாகவும் பிரிட்டன் அரசு அறிவித்துள்ளது.
