பிரிட்டனின் தெற்குப் பகுதியைச் சூறையாடி வரும் இந்தப் புயலால் சாலை, ரயில் மற்றும் வான்வழிப் போக்குவரத்து சேவைகள் பெருமளவில் முடங்கியுள்ளன. குறிப்பாகக் கான்வால், டெவோன் மற்றும் ஜெர்சி ஆகிய பகுதிகளில் பலத்த காற்றுடன் கனமழை பெய்து வருவதால் மரங்கள் மற்றும் மின் கம்பங்கள் சாய்ந்து விழுந்துள்ளன. இதில் பிரைட்டன் நகரில் 1866ஆம் ஆண்டு கட்டப்பட்ட வரலாற்றுச் சிறப்புமிக்க ‘வெஸ்ட் பியர்’ (West Pier) பாலத்தின் ஒரு பகுதி பலத்த காற்றினாலும் ராட்சத அலைகளினாலும் இடிந்து கடலில் மூழ்கியது.
புயலின் தாக்கத்தால் 18,000-க்கும் மேற்பட்ட வீடுகளில் மின் விநியோகம் தடைபட்டுள்ள நிலையில், முன்னெச்சரிக்கை நடவடிக்கையாகப் பல பள்ளிகள் மூடப்பட்டுள்ளன. ஜெர்சி விமான நிலையத்தில் அனைத்துக் காலை நேர விமானச் சேவைகளும் ரத்து செய்யப்பட்டதுடன், பயணிகள் தேவையின்றிப் பயணம் செய்ய வேண்டாம் என பிரிட்டன் வானிலை ஆய்வு மையம் ஆரஞ்சு எச்சரிக்கை விடுத்துள்ளது.
பாதிக்கப்பட்ட பகுதிகளில் அவசரகால மீட்புக் குழுவினர் தூய்மைப் பணிகளிலும் மின் இணைப்புகளைச் சீரமைக்கும் நடவடிக்கைகளிலும் தீவிரமாக ஈடுபட்டு வருகின்றனர்.
புயலின் நகர்வை அதிகாரிகள் தொடர்ந்து கண்காணித்து வரும் நிலையில், வானிலை சீரடையும் வரை பொதுமக்கள் பாதுகாப்பாக இருக்குமாறு கேட்டுக்கொள்ளப்பட்டுள்ளனர்.
