சென்னை விமான நிலையத்தில் இருந்து சிங்கப்பூர் செல்வதற்காக இண்டிகோ விமானத்தில் முன்பதிவு செய்து ஏறிய அர்ச்சனா வீரமணி, குடிவரவு சோதனைகளை முடித்துவிட்டு விமானத்திற்குள் அமர்ந்திருந்தார். இந்த விவகாரம் குறித்துத் தகவலறிந்த சிறப்புப் புலனாய்வுப் பிரிவு (SIT) காவல்துறையினர் உடனடியாக விமான நிலையத்திற்கு விரைந்து சென்று அதிகாரிகளை எச்சரித்தனர். புறப்படுவதற்குச் சில நிமிடங்களுக்கு முன்பு விமானத்தில் இருந்த அவரை காவல்துறையினர் கீழே இறக்கி விசாரணைக்காக அழைத்துச் சென்றனர்.
ஜெம் கிரானைட்ஸ் நிறுவன உரிமையாளர் வீரமணி மீதான போக்சோ மற்றும் பாலியல் வழக்குகள் தொடர்பாகச் சிறப்புப் புலனாய்வுப் பிரிவு காவல்துறையினர் தீவிர விசாரணை நடத்தி வருகின்றனர். இந்த வழக்கில் நிதிப் பரிமாற்றங்கள் மற்றும் சாட்சிகளை மறைக்க முயன்ற நபர்கள் குறித்தும், வீரமணிக்கு உதவியவர்கள் குறித்தும் காவல்துறையினர் தொடர் விசாரணைகளை மேற்கொண்டு வருவதாகக் கூறப்படுகிறது. இந்தச் சூழலில் வெளிநாட்டுக்குத் தப்பியோட முயன்ற அவரது மகளின் பயணம் முறியடிக்கப்பட்டுள்ளது.
விமானத்தில் இருந்து இறக்கப்பட்ட அர்ச்சனாவிடம் காவல்துறையினர் முதற்கட்ட விசாரணையை மேற்கொண்டதைத் தொடர்ந்து, மேலதிக விசாரணைக்காகப் பாதுகாப்பான இடத்திற்கு அழைத்துச் செல்லப்பட்டுள்ளார்.
இந்த வழக்கில் தொடர்புடைய மற்ற நபர்கள் குறித்தும், வெளிநாடுகளுக்குத் தப்பியவர்கள் குறித்தும் காவல்துறையினர் தீவிரமான சட்ட நடவடிக்கைகளை முடுக்கிவிட்டுள்ளனர்.
