ஜப்பான் நாட்டுத் தரைப்படைப் பிரிவான தற்காப்புப் படையின் (GSDF) தலைமைத் தளபதி ஜெனரல் மசயோஷி அராை, ஜப்பானியப் பாதுகாப்புப் பணியாளர்கள் இந்தியாவுக்கு அனுப்பி வைக்கப்பட்டுள்ளதாகச் செய்தியாளர் சந்திப்பில் உறுதிப்படுத்தியுள்ளார். ஜப்பானில் நிலவும் இடப்பற்றாக்குறை காரணமாக, சுமார் 1,000 கிலோமீட்டர் தொலைவு வரை தாக்கக்கூடிய டைப்-25 (Type-25) ரக ஏவுகணைகள் மற்றும் சிறிய தாக்குதல் டிரோன்களுக்கான பயிற்சிகளை மேற்கொள்வதில் சவால்கள் எழுந்துள்ளன. இதனைச் சமாளிக்கும் வகையில் வெளிநாடுகளில் பயிற்சி சூழல்களைப் பயன்படுத்துவது குறித்து அந்நாட்டு அரசு தீவிரமாக ஆலோசித்து வருகிறது.
கடந்த அக்டோபர் மாத நடுப்பகுதியில் ஜப்பானியப் பாதுகாப்பு அமைச்சக அதிகாரிகள் குழு ஒன்று இந்தியாவுக்கு வருகை தந்து, இங்குள்ள ஏவுகணை பரிசோதனை மையங்கள் மற்றும் துப்பாக்கிச் சூடு பயிற்சித் தளங்களைப் பார்வையிட்டு ஆய்வு நடத்தியுள்ளதாகத் தகவல்கள் வெளியாகியுள்ளன. இந்தியா தனது சொந்த ஏவுகணைப் பரிசோதனைகளுக்கு ஒடிசா மாநிலம் சாந்திபூர் மற்றும் வங்காள விரிகுடா பகுதிகளைப் பயன்படுத்தி வருவதை அவர்கள் நேரில் ஆய்வு செய்தனர். இந்த விவகாரம் தொடர்பாக இந்தியாவுடன் பல்வேறு விஷயங்களை ஒருங்கிணைக்கப் பணியாளர்கள் அனுப்பப்பட்டதாக ஜெனரல் மசயோஷி அராை தெரிவித்தார்.
இந்தோ-பசிபிக் பிராந்தியத்தில் இந்தியா மற்றும் ஜப்பான் இடையேயான பாதுகாப்பு ஒத்துழைப்பு அதிகரித்து வரும் நிலையில், ஜப்பானின் இந்த முயற்சி இரு நாடுகளுக்கு இடையேயான ராணுவ உறவை மேலும் பலப்படுத்தும் என எதிர்பார்க்கப்படுகிறது. தொலைதூர இலக்குகளைத் தாக்கக்கூடிய நவீன ஆயுதக் தளவாடங்களை ஜப்பான் விரிவுபடுத்தி வருவதால், வீரர்களுக்கு முறையான பயிற்சி அளிப்பதற்கான இடத்தைத் தேர்வு செய்வது அவசியமாகியுள்ளது.
இந்தியாவில் உள்ள பயிற்சி மற்றும் பரிசோதனை வசதிகளைப் பயன்படுத்துவது தொடர்பான முதற்கட்டப் பேச்சுவார்த்தைகள் மற்றும் ஆய்வுகள் தற்போது தொடக்க நிலையில் உள்ளன.
இரு நாடுகளின் அதிகாரிகளும் இணைந்து மேற்கொண்ட இந்த ஆய்வுகளின் அடிப்படையில் எதிர்காலப் பயிற்சி திட்டங்கள் குறித்த இறுதி முடிவுகள் எடுக்கப்படும் என எதிர்பார்க்கப்படுகிறது.
