அமெரிக்காவிற்கும் ஈரானுக்கும் இடையே நிலவி வரும் தீவிரமான போர்ப் பதற்றத்திற்கு மத்தியில், அமைதிப் பேச்சுவார்த்தைகளை மீண்டும் தொடங்கும் முயற்சியாக அமெரிக்கத் துணை அதிபர் ஜே.டி. வேன்ஸ், ஈரானின் உச்ச தேசிய பாதுகாப்பு கவுன்சில் தலைவர் மொஹ்சென் ரெசாய்க்கு கடிதம் ஒன்றை அனுப்பியுள்ளார். ‘தி வால் ஸ்ட்ரீட் ஜர்னல்’ நாளிதழ் வெளியிட்டுள்ள தகவல்களின்படி, வரும் வாரங்களில் அமெரிக்கா நடத்தக்கூடும் எனக் கூறப்படும் ராணுவத் தாக்குதல்களைத் தவிர்ப்பதற்கும் இருநாடுகளுக்கு இடையேயான பேச்சுவார்த்தையை மீண்டும் நடத்துவதற்கும் இக்கடிதம் வாயிலாக முயற்சி மேற்கொள்ளப்பட்டுள்ளது.
நவம்பர் 3-ஆம் தேதி நடைபெறவுள்ள அமெரிக்க இடைக்காலத் தேர்தலுக்குப் பிறகு ஈரான் மீது மீண்டும் தாக்குதல் நடத்தப்படும் என அமெரிக்க அதிபர் டொனால்ட் டிரம்ப் தொடர்ந்து எச்சரிக்கை விடுத்து வருகிறார். “அவர்கள் ஒப்பந்தம் செய்ய விரும்புகிறார்கள், ஆனால் தாமதப்படுத்துகிறார்கள்” என்று டிரம்ப் தெரிவித்திருந்தார். இந்நிலையில், கத்தார் நாட்டின் மத்தியஸ்தத்தில் முன்வைக்கப்பட்டுள்ள புதிய அமைதித் திட்டத்தை ஈரான் பரிசீலித்து வருவதாகவும், இரு நாடுகளும் பரஸ்பர நம்பிக்கை வளர்க்கும் நடவடிக்கைகளை மேற்கொள்ள வாய்ப்புள்ளதாகவும் தகவல்கள் தெரிவிக்கின்றன.
அமெரிக்கா மற்றும் இஸ்ரேலின் தாக்குதல் அச்சுறுத்தல்களுக்குப் பதிலளிக்கும் வகையில் வளைகுடாப் பகுதியில் உள்ள கடலடி தொலைத்தொடர்பு கேபிள்களை இலக்கு வைத்துத் தாக்குதல் நடத்தத் திட்டம் தீட்டப்பட்டுள்ளதாக ஈரானிய அதிகாரிகள் எச்சரித்துள்ளனர். இதனிடையே, முக்கிய நிபந்தனைகள் நிறைவேற்றப்படும் வரை அமெரிக்காவுடன் நேரடியாகப் பேச்சுவார்த்தை நடத்தப்பட மாட்டாது என மொஹ்சென் ரெசாய் சமீபத்தில் கூறியிருந்தார்.
அமெரிக்க இடைக்காலத் தேர்தலுக்கு முன்னதாகத் தூதரக ரீதியிலான இந்த நகர்வு சர்வதேச அளவில் முக்கியத்துவம் வாய்ந்ததாகப் பார்க்கப்படுகிறது.
ஜே.டி. வேன்ஸின் இந்த அமைதி முயற்சியை ஏற்று ஈரான் பேச்சுவார்த்தைக்கு முன்வருமா என்பது குறித்த அதிகாரப்பூர்வ அறிவிப்புகள் விரைவில் வெளியாகும் என எதிர்பார்க்கப்படுகிறது.
