உலகின் மிகப்பெரிய கிரிப்டோகரன்சி பரிவர்த்தனை தளமான பைனான்ஸ் (Binance) மீது நடத்தப்பட்ட இணையவழி தாக்குதலில் சுமார் 6.3 பில்லியன் அமெரிக்க டாலர் (சுமார் ரூ.53,000 கோடிக்கும் அதிகம்) மதிப்புள்ள கிரிப்டோகரன்சிகள் திருடப்பட்டுள்ளன. உலக வரலாற்றிலேயே மிகப்பாரிய நிதித் திருட்டாகக் கருதப்படும் இச்சம்பவத்திற்கு, வடகொரிய அரசாங்கத்தின் ஆதரவுடன் இயங்கும் ‘லசரஸ் குரூப்’ (Lazarus Group) என்ற ஹேக்கர்கள் குழுவே காரணம் என அமெரிக்கக் புலனாய்வு அமைப்பான எஃப்பிஐ (FBI) உறுதிபடத் தெரிவித்துள்ளது. பைனான்ஸ் நிறுவனத்தின் பொறியாளர் ஒருவரது மடிக்கணினி ஹேக் செய்யப்பட்டதே இந்த பாதுகாப்பு மீறலுக்கு முதன்மை காரணம் என விசாரணையில் தெரியவந்துள்ளது.
எஃப்பிஐ வெளியிட்ட அறிக்கையின்படி, ‘ட்ரேடர்ட்ரைட்டர்’ (TraderTraitor) என்றும் அழைக்கப்படும் இந்த லசரஸ் அமைப்பினர், களவாடப்பட்ட நிதியை எத்தேரியம் (Ethereum) டிஜிட்டல் நாணயமாக மாற்றிப் பல கட்டங்களாகப் பணப்பரிவர்த்தனைகளைச் செய்து மறைத்து வருகின்றனர். முன்னதாக 2025-ஆம் ஆண்டில் ‘பைபிட்’ (Bybit) என்ற தளத்தில் 1.5 பில்லியன் டாலர் திருடப்பட்ட சம்பவத்திலும் இதே ஹேக்கர்கள் குழு ஈடுபட்டிருந்தது குறிப்பிடத்தக்கது. இந்த நிதி இழப்பைத் தங்களது சொந்த மூலதனத்தில் இருந்து ஈடுசெய்யப் போவதாகவும், பயனாளர்களுக்கு எந்தவித பாதிப்பும் ஏற்படாது என்றும் பைனான்ஸ் நிர்வாகம் அறிவித்துள்ளது.
இந்த மெகா ஹேக்கிங் சம்பவம் தொடர்பாக கருத்து தெரிவித்த அமெரிக்க அதிபர் டொனால்ட் டிரம்ப், இதன் பின்னணியில் வடகொரியா தான் உள்ளதா என்பதைத் தாம் இன்னும் முழுமையாக அறிந்திருக்கவில்லை எனக் கூறியுள்ளார். எனினும், சட்டவிரோத இணையக் குற்றங்கள் மூலம் திரட்டப்படும் பணத்தைக் கொண்டு வடகொரியா தனது ஆயுதத் திட்டங்களுக்குப் பயன்படுத்துவதைத் தடுக்க தனியார் நிதி நிறுவனங்கள் எச்சரிக்கையுடன் செயல்பட வேண்டும் என எஃப்பிஐ வலியுறுத்தியுள்ளது.
தற்போது களவாடப்பட்ட டிஜிட்டல் நிதியின் நகர்வுகளைச் சர்வதேச இணையப் பாதுகாப்பு நிபுணர்கள் தீவிரமாகக் கண்காணித்து வருகின்றனர்.
பாதிக்கப்பட்ட முகவரிகளுடன் தொடர்புடைய பரிவர்த்தனைகளை உடனடியாக முடக்குமாறு அனைத்துக் கிரிப்டோகரன்சி பரிவர்த்தனை மையங்களுக்கும் எஃப்பிஐ கோரிக்கை விடுத்துள்ளது.
