தைவான் நாட்டின் பிரத்தியேக பொருளாதார மண்டலத்திற்கு உட்பட்ட கிழக்குக் கடல் பகுதியில் சீனக் கடலோரக் காவல் படைக்குச் சொந்தமான ரோந்துப் படகுகள் சட்டவிரோதமாக நுழைந்து சட்ட அமலாக்க ரோந்து நடவடிக்கைகளில் ஈடுபட்டு வருகின்றன. ரேடியோ அலைவரிசைகள் மூலம் தைவான் கடல் எல்லைக்குள் பயணிக்கும் கப்பல்களைத் தொடர்புகொண்டு அச்சுறுத்தும் வகையில் சீனா செயல்பட்டு வருவதாகத் தைவான் கடலோரக் காவல் நிர்வாகம் (CGA) தெரிவித்துள்ளது. சர்வதேசச் சட்ட மீறலான இந்த நடவடிக்கை மூலம் பிராந்திய அமைதி மற்றும் ஸ்திரத்தன்மையைச் சீர்குலைக்கச் சீனா முயல்வதாகத் தைவான் சாடியுள்ளது.
சீனாவின் இத்தகைய அத்துமீறல் நடவடிக்கைகளைத் தடுப்பதற்காகத் தைவான் கடலோரக் காவல் படை தனது ‘ஜி ஆன்’ (Ji An) உள்ளிட்ட பாதுகாப்புப் படகுகளைக் கண்காணிப்புப் பணியில் ஈடுபடுத்தியுள்ளது. தைவான் ஒரு இறையாண்மை கொண்ட சுதந்திர நாடு என்றும், தைவானியக் கடல் எல்லை மீது சீனாவுக்கு எவ்வித அதிகார வரம்பும் இல்லை என்றும் தைவான் தெளிவுபடுத்தியுள்ளது. மேலும், கிழக்குப் பகுதியில் கடல்வழித் தடங்களை முடக்கும் நோக்கில் சீனா இத்தகைய பயிற்சிகளை மேற்கொண்டு வருவதாகத் தைவான் பாதுகாப்பு அதிகாரிகள் சுட்டிக்காட்டியுள்ளனர்.
இந்த எல்லை மீறல் சம்பவங்கள் தொடர்பாகப் பிரான்ஸ், ஜெர்மனி மற்றும் பிரிட்டன் ஆகிய நாடுகள் ஏற்கனவே கவலை தெரிவித்துள்ள நிலையில், பிராந்தியப் பாதுகாப்பில் சீனா பதற்றத்தை அதிகரிப்பதாகக் கண்டனங்கள் எழுந்துள்ளன.
தற்போது தைவான் கடற்படை மற்றும் கடலோரக் காவல் படையினர் எல்லைப் பகுதிகளில் தங்களது ரோந்து மற்றும் கண்காணிப்புப் பணிகளை தீவிரப்படுத்தியுள்ளனர்.
எல்லை பாதுகாப்பு மற்றும் இறையாண்மையைப் பாதுகாக்கத் தேவையான அனைத்து நடவடிக்கைகளும் தொடர்ந்து மேற்கொள்ளப்படும் எனத் தைவான் அரசு அறிவித்துள்ளது.
