அமெரிக்காவிற்கும் ஈரானுக்கும் இடையே நிலவி வரும் மோதல் சூழலைத் தணிக்கப் பல்வேறு சர்வதேச நாடுகள் தீவிர தூதரக முயற்சிகளில் ஈடுபட்டு வருகின்றன. இந்தச் சூழலில் ஊடகங்களுக்குப் பேட்டியளித்த அமெரிக்க வெளியுறவுத் துறை அமைச்சர் மார்கோ ரூபியோ, பேச்சுவார்த்தைகளில் குறிப்பிடத்தக்க முன்னேற்றம் எதுவும் ஏற்படவில்லை என்று கூறியுள்ளார். ஈரான் அரசு முன்வைக்கும் நிபந்தனைகள் முற்றிலும் நடைமுறைக்குச் சாத்தியமற்றதாகவும், ஏற்றுக்கொள்ள முடியாத அளவுக்கு முட்டாள்தனமாகவும் இருப்பதாக அவர் குற்றம்சாட்டியுள்ளார்.
அமைதிப் பேச்சுவார்த்தைக்கு அமெரிக்கா தயாராக இருந்தபோதிலும், ஈரானின் பிடிவாதப் போக்கால் பேச்சுவார்த்தைகள் எந்தவிதப் பலனும் அளிக்காமல் ஸ்தம்பித்துள்ளதாக அவர் சாடியுள்ளார். அதேவேளையில், ஈரானின் வெளியுறவுத் துறை அமைச்சர் அப்பாஸ் அராக்சி X தளத்தில் பதிவிட்ட தகவலில், அனைத்து முனைகளிலும் போரை உடனடியாக நிறுத்த வேண்டும் என்ற நிபந்தனையுடன் தங்களது 2 நாள் அமைதித் திட்ட முன்மொழிவு இன்னமும் நடைமுறையில் உள்ளதாகக் குறிப்பிட்டுள்ளார். மேலும் போர் தொடருமானால் தீவிர ராணுவ பதிலடி கொடுக்கப்படும் என்றும் ஈரான் தரப்பில் எச்சரிக்கப்பட்டுள்ளது.
இரு நாடுகளுக்கும் இடையே தூதரக சமரசத்தை ஏற்படுத்தப் பல்வேறு நட்பு நாடுகள் தொடர் முயற்சிகளை மேற்கொண்டு வருகின்றன.
எனினும் ஈரானின் நிபந்தனைகளில் மாற்றம் ஏற்படாத வரை பேச்சுவார்த்தைகளில் முன்னேற்றம் ஏற்படுவது கடினம் என்பதால் தற்போதைக்கு அமைதி ஏற்படுவதில் தாமதம் நிலவுகிறது.
