பஹ்ரைன் தலைநகர் மனாமாவில் ஜிசிசி நாடுகளின் பாதுகாப்பு அமைச்சர்கள் பங்கேற்ற 23-வது கூட்டத்தில் இந்த முக்கிய முடிவு எடுக்கப்பட்டதாகப் பேரவையின் பொதுச்செயலாளர் ஜாசெம் முகமது அல்-புதைவி அறிவித்துள்ளார். இந்த புதிய ராணுவத் தலைமை மையத்திற்குக் தகுந்த ராணுவப் படைகளை நிலைநிறுத்தவும் கூட்டத்தில் ஒப்புதல் வழங்கப்பட்டுள்ளதாக அவர் தெரிவித்தார். வளைகுடா நாடுகளின் பிராந்தியப் பாதுகாப்பை உறுதிப்படுத்தவும், பாதுகாப்பு நடவடிக்கைகளில் ஒருங்கிணைப்பை மேம்படுத்தவும் இந்த முடிவு எடுக்கப்பட்டுள்ளது.
ஏற்கெனவே சவுதி அரேபியாவின் தலைநகர் ரியாத்தில் ஜிசிசி கூட்டமைப்பின் ஒருங்கிணைந்த ராணுவத் தலைமை இயங்கி வருவது குறிப்பிடத்தக்கது. இந்த புதிய மேம்பட்ட கட்டளை மையம் குவைத்தில் அமைக்கப்படுவதன் மூலம், பிராந்தியத்தில் எழும் பாதுகாப்பு சவால்களைத் திறம்பட எதிர்கொள்ளவும் கூட்டுப் பயிற்சிகளை மேற்கொள்ளவும் வசதியாக இருக்கும் என எதிர்பார்க்கப்படுகிறது. கடந்த ஏப்ரல் மாதம் ஜெட்டாவில் நடைபெற்ற ஜிசிசி தலைவர்களின் உச்சிமாநாட்டில் விவாதிக்கப்பட்ட பாதுகாப்பு மேம்பாட்டுத் திட்டங்களின் தொடர்ச்சியாக இந்த நடவடிக்கை எடுக்கப்பட்டுள்ளது.
வளைகுடா நாடுகளின் இறையாண்மை மற்றும் பிராந்திய ஒருமைப்பாட்டைப் பாதுகாக்க உறுப்பு நாடுகள் ஒன்றிணைந்து செயல்பட வேண்டும் என்று இக்கூட்டத்தில் வலியுறுத்தப்பட்டுள்ளது. கூட்டுப் பாதுகாப்பை மேம்படுத்துவதுடன், எல்லைப் பாதுகாப்பு மற்றும் வான்வெளிப் பாதுகாப்பை பலப்படுத்துவதில் இந்த புதிய மையம் முக்கியப் பங்காற்றும் என நம்பப்படுகிறது.
குவைத்தில் அமைக்கப்பட உள்ள இந்த மேம்பட்ட ராணுவ மையத்திற்கான அடுத்த கட்டப் பணிகள் மற்றும் படைகள் அனுப்புவது குறித்த விவரங்கள் விரைவில் வெளியிடப்படும் என எதிர்பார்க்கப்படுகிறது.
