விழுப்புரம் மாவட்டம் செஞ்சியில் மாயமான சிறுமியைத் தேடும் பணியின்போது முட்புதரில் கண்டெடுக்கப்பட்ட மனித எலும்புக்கூடு குறித்து சிபிசிஐடி போலீசார் விசாரணை.
விழுப்புரம் மாவட்டம் செஞ்சியை அடுத்த ஆலம்பூண்டி ஊராட்சி நடுப்பட்டு கிராமத்தைச் சேர்ந்த வடிவேல் – பவானி தம்பதியின் 7 வயது மகள் ஹேமலதா கடந்த மாதம் மாயமானார். இந்த வழக்குத் தொடர்பாகச் சிபிசிஐடி போலீசார் தீவிர விசாரணை நடத்தி வரும் நிலையில், சிறுவாடி காப்புக்காடு மற்றும் பரதன் தாங்கல் ஏரிப் பகுதியில் தேடுதல் வேட்டை மேற்கொள்ளப்பட்டது. அப்போது அப்பகுதியிலுள்ள முட்புதர்களில் மனித எலும்புக்கூடு ஒன்று கண்டெடுக்கப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.
இதனைத் தொடர்ந்து அங்கு விரைந்த சிபிசிஐடி போலீசார், மோப்ப நாய் மற்றும் தடயவியல் நிபுணர்களின் உதவியுடன் அப்பகுதியில் பதிவான தடயங்களைச் சேகரிக்கும் பணியில் ஈடுபட்டனர். கண்டெடுக்கப்பட்ட எலும்புக்கூட்டின் அருகே கைலி, காலணி மற்றும் மதுப்புட்டி போன்ற பொருட்கள் கிடந்ததாகத் தகவல்கள் தெரிவிக்கின்றன. கடந்த சில வாரங்களாகியும் சிறுமி குறித்த எந்தத் தகவலும் கிடைக்காத சூழலில், தற்போது சிக்கியுள்ள இந்த எலும்புக்கூடு மாயமான சிறுமியுடையதா என்ற கோணத்தில் சந்தேகங்கள் எழுந்துள்ளன.
பல நாட்களாக காணாமல் போன விவகாரமும், தற்போது வனப்பகுதியில் எலும்புக்கூடு கண்டெடுக்கப்பட்டிருப்பதும் அப்பகுதி மக்களிடையே பெரும் சோகத்தையும் அச்சத்தையும் ஏற்படுத்தியுள்ளது. சிறுமியை மீட்கக் கோரி பல்வேறு தரப்பினரும் தொடர்ந்து கோரிக்கைகளை விடுத்து வரும் நிலையில், இந்தத் தடயம் வழக்கின் போக்கை மாற்றக்கூடும் என எதிர்பார்க்கப்படுகிறது. பெற்றோரும் பொதுமக்களும் உரிய நீதி கேட்டு வரும் சூழலில், காவல்துறையின் அடுத்தடுத்த நடவடிக்கைகளை அனைவரும் உன்னிப்பாகக் கவனித்து வருகின்றனர்.
கண்டெடுக்கப்பட்ட மனித எலும்புக்கூடு யாருடையது என்பதை உறுதி செய்வதற்காக அதனைத் தடயவியல் பரிசோதனைக்கு உட்படுத்தப் போலீசார் நடவடிக்கை எடுத்துள்ளனர். மருத்துவப் பரிசோதனை மற்றும் டிஎன்ஏ (DNA) முடிவுகள் வெளியான பிறகே அது குறித்த முழுமையான உண்மைகள் தெரியவரும் என அதிகாரிகள் தரப்பில் தெரிவிக்கப்பட்டுள்ளது. அந்த அறிவியல் ஆய்வறிக்கையின் அடிப்படையிலேயே சிறுமி மாயமான வழக்கின் அடுத்தகட்ட விசாரணைகள் தீவிரப்படுத்தப்படும்.
