மறைந்த கொளத்தூர் தொகுதி தவெக சட்டமன்ற உறுப்பினர் வி.எஸ். பாபுவின் இறுதி ஊர்வலத்தில், முதலமைச்சர் விஜய் அவரது உடலைத் தனது தோளில் சுமந்து சென்றார். நவம்பர் 20-ஆம் தேதி சென்னையில் நடைபெற்ற இறுதி ஊர்வலத்தில் பங்கேற்ற முதலமைச்சர், உடலைச் சிறிது தூரம் சுமந்து சென்று இறுதி மரியாதை செலுத்தினார்.
உடல்நலக் குறைவு காரணமாக மருத்துவமனையில் சிகிச்சை பெற்று வந்த 75 வயதான வி.எஸ். பாபு, நவம்பர் 19-ஆம் தேதி மாரடைப்பால் காலமானார். கடந்த சட்டப்பேரவைத் தேர்தலில் கொளத்தூர் தொகுதியில் வெற்றி பெற்ற இவர், சென்னை பெரம்பூர் திருநாவுக்கரசு தெருவில் உள்ள இல்லத்தில் பொதுமக்கள் அஞ்சலிக்காக வைக்கப்பட்டிருந்தார்.
அவரது மறைவுக்கு ஆளுநர், முதலமைச்சர் விஜய், திமுக தலைவர் மு.க. ஸ்டாலின் உள்ளிட்ட அரசியல் தலைவர்கள் இரங்கல் தெரிவித்திருந்தனர். இறுதி ஊர்வலத்தில் மதிமுக பொதுச் செயலாளர் வைகோ, தமிழக அமைச்சர்கள், தவெக சட்டமன்ற உறுப்பினர்கள் மற்றும் கட்சித் தொண்டர்கள் திரளாகப் பங்கேற்றனர்.
உடலைத் தோளில் சுமந்த பின்னர், இறுதி ஊர்வல ஊர்தியின் பின்னே முதலமைச்சர் விஜய் நடந்து சென்றார். திரு.வி.க. நகர், பல்லவன் சாலையில் உள்ள தாங்கல் மயானத்தில் வி.எஸ். பாபுவின் இறுதிச் சடங்குகள் நடைபெறுவதை முன்னிட்டு, அப்பகுதியில் காவல்துறையினர் பாதுகாப்பு ஏற்பாடுகளைச் செய்துள்ளனர்.