வாஷிங்டனில் இன்று நடைபெற்ற செய்தியாளர் சந்திப்பில் பேசிய அமெரிக்கப் பாதுகாப்புச் செயலாளர் பீட் ஹெக்செத், ஈரானுடன் எட்டப்பட்டுள்ள தற்காலிகப் போர்நிறுத்தம் அமெரிக்காவிற்கு கிடைத்த ஒரு மிகப்பெரிய ராணுவ வெற்றி என்று அறிவித்துள்ளார். “ஈரான் இந்த போர்நிறுத்தத்திற்காக எங்களிடம் கெஞ்சியது (Begged), இது அனைவருக்கும் தெரியும்” என்று அவர் குறிப்பிட்டுள்ளார். மேலும், அதிபர் டொனால்ட் டிரம்ப் இந்த மோதலில் “Capital V” (அதாவது மிகப்பெரிய அளவிலான) வெற்றியைக் கண்டுள்ளதாகவும், ஈரானின் ராணுவ வலிமையை அமெரிக்கா முற்றிலுமாகச் சிதைத்துவிட்டதாகவும் அவர் பெருமிதத்துடன் தெரிவித்துள்ளார்.
பென்டகன் நடத்திய “ஆபரேஷன் எபிக் பியூரி” (Operation Epic Fury) மூலம் ஈரானின் 13,000-க்கும் மேற்பட்ட இலக்குகள் தாக்கப்பட்டதாகத் தெரிவிக்கப்பட்டுள்ளது. ஈரானின் கடற்படையில் 90 சதவீதமும், வான் பாதுகாப்பு கட்டமைப்புகளும் முற்றிலும் அழிக்கப்பட்டுள்ளதாகப் பாதுகாப்புத் துறை தெரிவித்துள்ளது. “நாங்கள் அவர்களின் உள்கட்டமைப்புகளைத் தாக்கத் தயாராக இருந்தோம்; அந்தப் பயமே அவர்களைப் பேச்சுவார்த்தை மேசைக்குக் கொண்டு வந்துள்ளது” என்று ஹெக்செத் கூறியுள்ளார். ஈரானின் புதிய தலைமைக்கு வேறு வழியில்லாததால் இந்த ஒப்பந்தத்தை ஏற்றுக்கொண்டதாக அவர் சுட்டிக்காட்டியுள்ளார்.
இந்த ஒப்பந்தம் ஒரு போர்நிறுத்தம் மட்டுமல்ல, இது அமெரிக்காவின் ‘கருணை’ (Mercy) என்று ஹெக்செத் வர்ணித்துள்ளார். ஈரானின் அணுசக்திப் பொருட்களைக் கைப்பற்றுவது குறித்துக் கேட்டபோது, “அவர்கள் தானாக முன்வந்து அதனை எங்களிடம் ஒப்படைக்க வேண்டும், இல்லையெனில் நாங்களே அதனை எடுத்துக்கொள்வோம்” என்று அவர் எச்சரிக்கை விடுத்துள்ளார். தற்போது அமெரிக்கப் படைகள் மத்திய கிழக்கு பிராந்தியத்தில் இருந்து எங்கும் வெளியேறப் போவதில்லை என்றும், ஈரான் ஒப்பந்தத்தை மீறினால் அடுத்த நிமிடமே தாக்குதல் தொடங்கும் என்றும் ராணுவத் தளபதி ஜெனரல் டான் கெய்ன் (Dan Caine) உறுதிப்படுத்தியுள்ளார்.
ஈரான் இந்த வெற்றிக் கோரிக்கையை மறுத்துள்ள போதிலும், அமெரிக்க நிர்வாகம் இதனைத் தங்களின் ராஜதந்திர வெற்றியாகவே பார்க்கிறது. குறிப்பாக, டிரம்பின் இந்த அதிரடிப் போக்கு ஈரானின் அணு ஆயுதக் கனவை முடிவுக்குக் கொண்டு வந்துள்ளதாக ஹெக்செத் நம்பிக்கை தெரிவித்துள்ளார். அடுத்த இரண்டு வாரங்கள் போர் இடைநிறுத்தமாக இருந்தாலும், அமெரிக்காவின் பி-52 போர் விமானங்கள் மற்றும் பிற ராணுவப் பிரிவுகள் இன்னும் தயார் நிலையிலேயே (High Alert) வைக்கப்பட்டுள்ளன. இஸ்லாமாபாத் பேச்சுவார்த்தைக்கு முன்னதாக ஹெக்செத் வெளியிட்டுள்ள இந்த “வெற்றி முழக்கம்” ஈரானிய தரப்பில் கடும் அதிருப்தியை ஏற்படுத்தியுள்ளது.
