அந்த நேரத்தில் உடல் எல்லாம் பற்றி எரிவது போல இருந்தது, கருப்பையையே எடுத்து விடலாமா என்று கூட தோன்றியது என்று மனம் திறந்து பேசியுள்ளார், நடிகை ஐஸ்வர்யா பாஸ்கரன்:
தென்னிந்தியத் திரையுலகில் பிரபலமான நடிகை ஐஸ்வர்யா பாஸ்கரன், பெண்கள் பொதுவாகப் பேசத் தயங்கும் மாதவிடாய் நின்ற கால (Menopause) பாதிப்புகள் குறித்து முதன்முறையாக மனம் திறந்துள்ளார். தனது 46 அல்லது 47 வயதில் இந்த நிலை தொடங்கியதாகக் குறிப்பிட்ட அவர், அது தனக்கு ஒரு பெரும் மன உளைச்சலாகவும் (Trauma) உடல் ரீதியான சித்திரவதையாகவும் இருந்ததாகத் தெரிவித்துள்ளார். ஏசி அறையில் அமர்ந்திருந்தாலும் முதுகில் வியர்வை கொட்டுவது, தாங்க முடியாத உடல் வெப்பம் மற்றும் காரணமே இல்லாமல் திடீரென அழுகை வருவது போன்ற மனநிலை மாற்றங்கள் தன்னை நிலைகுலையச் செய்ததாக அவர் உருக்கமாகப் பகிர்ந்துள்ளார்.
குறிப்பாக, கேரளாவில் படப்பிடிப்பில் இருந்தபோது தான் சந்தித்த ஒரு துயரமான சம்பவத்தை அவர் நினைவு கூர்ந்துள்ளார். அந்தச் சமயத்தில் அவருக்கு ஏற்பட்ட அதிகப்படியான இரத்தப்போக்கு காரணமாக, அவர் படுத்திருந்த படுக்கையே இரத்தத்தில் நனைந்ததாகவும், “உயிரே உடலை விட்டுப் போவது போன்ற வலி” இருந்ததாகவும் கூறியுள்ளார். அந்த வலியின் தீவிரத்தில், “தன் கைகளாலேயே தனது கருப்பையைத் தோண்டி எடுத்துவிடலாமா?” என்று தோன்றும் அளவிற்கு வேதனை அனுபவித்ததாக அவர் கூறியது காண்போரை அதிரச் செய்துள்ளது.
இந்த இக்கட்டான நிலையில் தனது தாயின் அறிவுரைப்படி யோகா பயிற்சியை அவர் மேற்கொள்ளத் தொடங்கியுள்ளார். சுமார் 40 நாட்கள் தொடர்ந்து யோகா செய்த பிறகு, அவரது உடலில் வியக்கத்தக்க மாற்றங்கள் ஏற்பட்டுள்ளன. அதிகப்படியான வியர்வை, உடல் வெப்பம் மற்றும் தேவையற்ற கோபம், அழுகை போன்ற பாதிப்புகள் முற்றிலும் நின்றுவிட்டதாகவும், இப்போது தனது உடலும் மனமும் தனது கட்டுப்பாட்டில் இருப்பதாகவும் அவர் நெகிழ்ச்சியுடன் தெரிவித்துள்ளார். தனக்கு நல்வழி காட்டிய சத்குருவின் யோகா வகுப்புகளுக்குத் தனது நன்றியைத் தெரிவித்துள்ள அவர், பெண்கள் தங்களின் உடல் நலனில் அக்கறை காட்ட வேண்டியதன் அவசியத்தையும் இதன் மூலம் வலியுறுத்தியுள்ளார்.
