உத்தரப் பிரதேச மாநிலம் அம்ரோகா (Amroha) பகுதியைச் சேர்ந்த 14 வயது சிறுவன் அமித், கடந்த வியாழக்கிழமை மாலை தனது கிராமத்தில் விளையாடிக் கொண்டிருந்தபோது விஷப் பாம்பு கடித்தது. சிறுவன் உடனடியாகத் தனது பெற்றோரிடம் இது குறித்துத் தெரிவித்துள்ளான். ஆனால், அவர்கள் சிறுவனை உடனடியாக மருத்துவமனைக்கு அழைத்துச் செல்வதற்குப் பதிலாக, ஒரு உள்ளூர் மந்திரவாதியை (Tantrik) அணுகியுள்ளனர். அந்த மந்திரவாதி, சிறுவனின் உடலில் ஏறியுள்ள விஷத்தை முறிக்க கங்கை நதியின் புனித நீர் உதவும் என்றும், சிறுவனை நதியில் மிதக்க விடுமாறும் வினோதமான ஆலோசனையை வழங்கியுள்ளார்.
மந்திரவாதியின் பேச்சை அப்படியே நம்பிய பெற்றோர், சிறுவனை கங்கை நதிக்குக் கொண்டு சென்றனர். அங்கு மூங்கில் கம்புகளைக் கொண்டு ஒரு தற்காலிக அமைப்பை உருவாக்கி, அதில் சிறுவனைக் கட்டி சுமார் 12 மணி நேரம் கங்கை நதியின் குளிர்ந்த நீரில் மிதக்க விட்டுள்ளனர். நதித் தாய் சிறுவனின் உயிரைக் காப்பாற்றுவார் என்ற குருட்டு நம்பிக்கையில், இரவு முழுவதும் பெற்றோர் ஆற்றங்கரையில் காத்திருந்தனர். ஆனால், நேரம் செல்லச் செல்ல சிறுவனின் உடலில் எவ்வித அசைவும் இல்லை என்பதைக் கண்டு, இறுதியாக அவர்கள் சிறுவனை அருகில் உள்ள மருத்துவமனைக்குக் கொண்டு சென்றனர்.
சிறுவனைப் பரிசோதித்த மருத்துவர்கள், அவன் ஏற்கனவே இறந்துவிட்டதாகத் தெரிவித்தனர். சரியான நேரத்தில் மருத்துவமனைக்கு அழைத்து வந்து ‘ஆன்டி-வெனம்’ (Anti-venom) ஊசி செலுத்தியிருந்தால் சிறுவனின் உயிரைக் காப்பாற்றியிருக்கலாம் என மருத்துவர்கள் வேதனையுடன் தெரிவித்தனர். மூடநம்பிக்கையின் காரணமாக ஒரு இளம் உயிர் பறிபோனது அப்பகுதியில் பெரும் சோகத்தை ஏற்படுத்தியுள்ளது. சிறுவன் இறந்ததை அறிந்ததும், அவனது உடலை அங்கேயே கங்கை நதியில் வீசவும் பெற்றோர் முயன்றதாக அதிர்ச்சியூட்டும் தகவல்கள் வெளியாகியுள்ளன.
இந்தச் சம்பவம் குறித்துப் பேசிய மாவட்ட சுகாதார அதிகாரி டாக்டர் சஷாங்க் சவுத்ரி, “பாம்பு கடிக்கு முறையான மருத்துவ சிகிச்சை மட்டுமே தீர்வு; மந்திரவாதிகளிடம் செல்வது உயிருக்கே ஆபத்தானது எனத் தொடர்ந்து விழிப்புணர்வு ஏற்படுத்தி வருகிறோம். ஆனால், இன்றும் நிலவும் இத்தகைய மூடநம்பிக்கைகள் வேதனை அளிக்கின்றன” என்றார். இந்த விவகாரத்தில் உயிருக்கு ஆபத்தான ஆலோசனையை வழங்கிய மந்திரவாதி மீது வழக்குப் பதிவு செய்யப்பட்டுள்ளதா என்பது குறித்து போலீசார் விசாரணை நடத்தி வருகின்றனர்.
