The US Navy is set for a confrontation with the Islamic Revolutionary Guard Corps so-called speedboat swarms as it tries to blockade the Strait of Hormuz within hours.: CNN-NEWS
அமெரிக்காவிற்கும் ஈரானுக்கும் இடையிலான அமைதிப் பேச்சுவார்த்தை தோல்வியில் முடிந்ததை அடுத்து, உலகமே அஞ்சும் வகையில் ஹார்முஸ் ஜலசந்தியை முற்றுகையிட அதிபர் டொனால்ட் டிரம்ப் அதிரடியாக உத்தரவிட்டுள்ளார். ஈரானின் அணுசக்தி திட்டங்களைக் கைவிட மறுத்ததால் ஆத்திரமடைந்த டிரம்ப், இன்று பிற்பகல் முதல் ஈரானின் அனைத்து துறைமுகங்களுக்கும் செல்லும் கப்பல்களை வழிமறிக்க அமெரிக்க கடற்படைக்கு (US Navy) கட்டளையிட்டுள்ளார். இதனால் பாரசீக வளைகுடா பகுதியில் எந்த நேரத்திலும் போர் வெடிக்கும் சூழல் உருவாகியுள்ளது.
ஈரானின் பிரதான போர்க்கப்பல்களை அமெரிக்கா ஏற்கனவே தாக்கி அழித்திருந்தாலும், ஈரானின் புரட்சிகர பாதுகாப்புப் படை (IRGC) வசம் இருக்கும் அதிவேகப் படகுகள் (Speedboats) தற்போது பெரும் சவாலாக மாறியுள்ளன. இந்தச் சிறிய ரகப் படகுகள் மூலம் அமெரிக்காவின் பிரம்மாண்ட போர்க்கப்பல்களைச் சூழ்ந்து தாக்குதல் நடத்த ஈரான் வியூகம் வகுத்துள்ளது. அதோடு, கடலில் கண்ணிவெடிகளைத் தூவுவது மற்றும் நீருக்கு அடியில் இயங்கும் டிரோன்களைப் பயன்படுத்துவது என ஈரானின் மறைமுகத் தாக்குதல் திட்டங்கள் அமெரிக்கக் கடற்படையினரை எச்சரிக்கையடையச் செய்துள்ளன.
இந்த முற்றுகை குறித்து ட்ரூத் சோஷியல் தளத்தில் பதிவிட்டுள்ள டிரம்ப், “அமெரிக்கக் கடற்படை உலகின் மிகச்சிறந்தது, ஈரானியத் துறைமுகங்களுக்குள் நுழையும் அல்லது வெளியேறும் எந்தக் கப்பலையும் நாங்கள் அனுமதிக்க மாட்டோம்” எனத் திட்டவட்டமாகத் தெரிவித்துள்ளார். மேலும், ஈரானுக்குச் வரி செலுத்திச் செல்லும் எந்தக் கப்பலுக்கும் சர்வதேசக் கடற்பரப்பில் பாதுகாப்பு வழங்கப்படாது என்றும், அமெரிக்கப் படைகள் மீது தாக்குதல் நடத்தும் எவரும் உடனடியாகப் பதிலடி கொடுத்து அழிக்கப்படுவார்கள் என்றும் அவர் கடுமையாக எச்சரித்துள்ளார்.
ஹார்முஸ் ஜலசந்தி வழியாகத்தான் உலகின் ஒட்டுமொத்த கச்சா எண்ணெய் தேவையில் ஐந்தில் ஒரு பங்கு கொண்டு செல்லப்படுகிறது. தற்போது டிரம்ப் அறிவித்துள்ள இந்த முற்றுகையால் உலகச் சந்தையில் கச்சா எண்ணெய் விலை பீப்பாய்க்கு 100 டாலரைத் தாண்டியுள்ளது. ஈரானின் சுரங்கப் பாதைகளில் பதுக்கி வைக்கப்பட்டுள்ள ஏவுகணைகள் மற்றும் டிரோன்கள் எப்போது வேண்டுமானாலும் ஏவப்படலாம் என்பதால், சர்வதேசக் கப்பல் போக்குவரத்து முற்றிலும் முடங்கும் அபாயம் ஏற்பட்டுள்ளது.
